首頁 arrow 綠色短評 arrow 香港人的覺醒!

香港人的覺醒! PDF 列印 E-mail
發表者 李南衡   
2012/05/25, Friday
        香港主權移交͘中國已經十五年ah,今年四月初香港街頭遊行的隊伍中有出現一面in稱呼作「米字旗」的旗仔。咱所熟似的英國國旗是大大的一個「米字」,但是「米字旗」是旗仔左旁頂頭四分之一是英國「米字」國旗,正旁一半是一個代表香港的盾牌,chit面原本是殖民時期的香港旗。佇遊行隊伍中間夯chit面旗,表示真濟香港少年人心中的憤怒kah不滿。

        無兩工,有中國媒體大聲罵香港人「背祖」,罵香港人奴隸性帶重,香港已經回歸祖國,好好一個中國人作,偏偏beh去作一個殖民地時代的人!有歲數的台灣人應該記持真深,第二次世界大戰了後,中國國民黨政府講是beh來「接收」台灣,兩年後的1947年,台灣人怨歎「狗去豬來」,所謂的「祖國」比日本帝國koh khah bái!特別是͘日本統治五十年的台灣人已經養成守法的習慣,逐項代誌都照規矩來;注重環境衛生養成清氣性;忽然間來一陣無守法、無衛生koh m̄ bat字的統治者,干單想beh歪哥貪污;台灣人當然會兩個政府the̍h來比,平平是殖民統治,日本的殖民統治者加真好。按呢,中國人tio̍h罵講台灣人是奴隸心態,猶teh數念hông殖民統治的時代。

        仝款的代誌佇香港發生,唯一無仝的是chit遍中國人是以比較khah有錢的身份去香港,總是中國人除了有錢以外,一切攏無法度kah香港比並。講話大細聲、行路無守交通規則,佇地下鐵車內飲食,囝仔隨便佇車內放尿,大人囝仔攏隨便佇公園樹仔腳放屎尿,當然會惹起香港人受氣。一下出聲,中國人包括北京大學教授罵香港人是殖民地文化的奴隸。那像台灣人比較兩個殖民統治者日本kah中國,香港人比較英國kah中國,中國實在有khah差,而且是差真濟。按呢,中國人tio̍h罵香港人是奴隸!罵香港人的同時,中國人敢感覺真見笑?

        不幸的是,中國有一寡講家己是「愛國的中國人」主張講:「中國tio̍h愛趕緊對香港人口清洗,加強輸入移民的氣力,͘香港變作一個一點仔都無特別的三流城市,到時取消邊境、廢除港票、禁止廣東話,振我天朝聲威!」阿娘喂,che kah昔當時中國國民黨佇台灣的作法有啥無仝?有夠恐怖!

        對八十年代以後出世的香港人來講,in m̄是大英帝國的人、in mā m̄是中國人,in認為家己是香港人。In佇遊行的時會夯出hit面代表香港的旗仔,表示香港人的失落感kah不滿愈來愈嚴重;中國政治的侵入,͘香港人感受失去自治、喪失身份的認同;愈來愈濟中國人拼入來香港,造成香港人愈來愈大的不安。

        香港人夯家己的旗仔出來,應該是香港人的覺醒!咱祝福in

 
< 前一個   下一個 >