首頁 arrow 綠色短評 arrow 感謝莊秉潔教授為咱講出良心話!

感謝莊秉潔教授為咱講出良心話! PDF Print E-mail
Written by 李南衡   
Friday, 08 June 2012
        中興大學環境工程系莊秉潔教授佇「國光石化」爭議過程中,提起伊的研究報告中有寫「六輕所排放一級致癌物排放量,佇中部地區五縣市中佔的比例:砷55%、鎘40%、汞29%,鉛kah戴奧辛攏是20%,伊用che進一步分析衛生署公布雲林縣主要癌症死亡率,發現沿海四鄉鎮的直腸癌、血癌偏懸。」台塑集團莊教授提起民事、刑事告訴,控告莊教授「毀損公司名譽」,求償四千萬,並要求佇四個平面媒體刊登回復名譽廣告。

        六月初六檢察官偵結,不起訴。檢察官認為莊秉潔是針對公眾議題發表評論,假使講伊的結論若是無夠客觀抑是有無夠嚴謹的所在,但是伊的發言是屬於善意,而且莊秉潔是受環保署邀請參與專家會議,是受雲林縣政府委託研究,koh是受邀請佇記者會頂面發言,發言的內容牽涉tio̍h的是公眾利益的環境保護kah國人健康,屬佇可受公評事項。照刑事訴訟法第256條規定,告訴人台塑集團若不服處分,會使向高等法院聲請再議,高等法院若認同chit-ê處分tio̍h結案,若無認同chit-ê處分tio̍h發回重審。台塑集團表示等待收tio̍h處分書了後再來研議,意思是猶未結束。

        關於民事部分告訴,台北地方法院已經tī 2012年五月初三第一遍審理,法官已經排定六月二一beh第二度審理。一般情形,刑事處分大約有七、八分會影響民事訴訟結果。莊秉潔教授所委託的律師詹順貴肯定地檢署檢察官,也認為台塑應該好好反省,類似chit款案猶未開庭就作出不起訴處分ê真罕得看tio̍h,表示台塑提告是非常無理由。詹順貴律師表示,台塑所講的「侵權行為」具體內容並無明確。構成侵權行為必須的要件是:tio̍h基於故意抑是過失、具有不法性,也就是明知che是錯誤的,猶koh「故意beh去毀謗防礙台塑名譽」去發表一個錯誤的內容,另外koh tio̍h造成對方「名譽上的損害」。

        莊秉潔教授講,知影不起訴,伊肯定司法還hō͘學術kah言論自由的空間。事實上chit件官司已經對學術界造成嚇驚別人敢出聲ê「寒蟬效應」。伊表示,「以後逐個寫論文,只要有根據、而且是出佇善意,就免驚會hông告防礙名譽ah!」莊秉潔教授講:「我the̍h國家hiah呢濟資源佇中興大學教二十年的冊,會tàng hō͘我專心作研究無啥外務,我受tio̍h國家按呢照顧,應該研究所得tio̍h的結果hō͘人民kah政府會tàng知影。」

        英國政治理論家柏克(Edmund Burke, 17291797)講:「邪惡會chhèng的唯一條件,就是善良的人恬恬無出聲。」

        感謝莊秉潔教授為咱講出良心話!

 
< Prev   Next >