首頁 arrow 綠色短評 arrow 東沙野保中心有夠讚!

東沙野保中心有夠讚! PDF Print E-mail
Written by 李南衡   
Friday, 29 June 2012
        東沙野保中心是「東沙環礁國家公園野生保育中心」的簡稱,六月二三接tio̍h海巡署通報,救援五隻珍貴稀罕的保育類海龜,安置佇東沙野保中心,Khah無彩的是其中有一隻綠蠵龜因為受傷嚴重,第二工中晝就死亡。另外三隻綠蠵龜kah一隻玳瑁,經過細膩療養觀察了後,kohkah水產試驗所澎湖海洋生物研究中心討論,雖然chiah-ê海龜的外表有小可破皮,但若是游泳情況kah進食情況良好,會使六月二八放in倒轉去海洋生活。這是東沙野保中心今年四月底成立以來,做收容kah救傷野生動物kah保育工作的頭一件。͘全世界的保育團體kah人士大聲拍pho̍k-á kah阿老!

 

        東沙野保中心是屬佇「環礁國家公園」下面的一個新機構。Chetio̍h ùi阿扁政府講起。2003年當時的經建會主委林信義有提一個案,認為「東沙環礁復育kah保育真正重要,除了加強海巡署執法能力以外,基於實務、專業kah績效的考量,是是有需要劃設作一個海洋型國家公園,請內政部會商相關機關審慎規劃研究。」2006年十二月十九,行政院核定內政部所報的「東沙海洋國家公園計畫」,而後為tio̍h凸顯所保育的東沙環礁生態kah地景特色,改作「東沙環礁國家公園」,成作台灣第七座國家公園。2008年二月初十,阿扁總統有去訪視,che當然是領土主權的宣示。讚!你看馬英九作總統到ta mā敢去。雖然坐飛機去成才點鐘niā-niā,而且歸個「東沙環礁國家公園」浮出水面的東沙島才1.74平方公里,但是使忽視的是歸個「東沙環礁國家公園」有五百平方公里,是台灣面積上大的國家公園。

        Koh khah重要是「環礁國家公園」有包含礁台、潟湖、沙洲、淺灘、水道kah島嶼等特殊地形,歸個東沙環礁的形成需要千萬年的時間,是世界級的地景景觀。Chit內底的珊瑚種類至少有三百種,珊瑚礁魚種有556種,真濟攏是台灣海域m̄-bat紀錄過的魚種;猶有算得濟的無脊椎動物;全世界攏總有六十種海草,南中國海海域共有二十種,干單東沙沿岸海域就記錄tio̍h七種;佇台灣本島相當普遍的一寡留鳥,佇東沙島只不過有過境、越冬的紀錄,顚倒一寡佇台灣本島罕得看tio̍h的鳥仔,佇東沙島卻是隱定過境的族群,超過一百三十種,甚至連國際保育鳥類唐白鷺也佇東沙島出現過。莫怪人會講:東沙島是候鳥的海上綠洲。

        除了chiah-ê以外,原生植物有七十二種,昆蟲有一百二五種。

 

        無論是天頂的、地上的、海底的各種生物,攏是東沙野保中心保育復育的對象。咱期待東沙野保中心會tàngkoh khah͘咱喝讚的代誌!

 
< Prev   Next >