首頁 arrow 綠色短評 arrow 擬訂歕啡仔人保護法,讚!

擬訂歕啡仔人保護法,讚! PDF Print E-mail
Written by 李南衡   
Friday, 13 July 2012
        七月十一,法務部長曾勇夫講:現此時的法律對證人kah檢舉人的保護雖然已經有相關的規定,但是以行政院前秘書長林益世案作例,檢舉人是先提供事證向媒體piak料,顯示現此時對保護、鼓勵挖(iah)空者的法制無夠周全。為tio̍h鼓勵民眾安心檢舉、勇敢檢舉,有beh參考外國法制,來制訂《歕啡仔人保護法》(也就是挖空者保護法),將檢舉制度化,鼓勵公務員善盡檢舉的責任,保護檢舉人權益tio̍h侵害。預定今年年底進前完成草稿研究案。

 

        「歕啡仔人」是啥款人?為啥物tio̍h kā保護?「歕啡仔人」是ùi英文字whistleblower翻譯過來的。原本的意思是警察歕啡仔叫你注意,今仔日已經變作「一個公民個人檢舉社會團體、公司、抑是政府機關內部非法活動抑是隱瞞的活動,檢舉的範圍包括違反法律、違反公共利益、公共安全,腐敗等代誌,檢舉人攏叫作歕啡仔人。」猶未訂chit-ê《歕啡仔人保護法》進前,檢舉人真有可能受tio̍h所屬的公司抑是政府機關修理,罪名是對公司抑是機關無盡tio̍h勞動契約產生的「忠誠義務」。像講前新海工會幹部林子文挖空公司有超收客戶瓦斯費用,煞͘公司解雇。雖然因為公司巧立名目增收費用員工加減會得tio̍h利益,但是工會為tio̍h大眾利益出來檢舉弊端煞͘公司解雇。告上法院,結果是二審法官以林子文「違反忠誠義務,情節重大」判決解雇成立。

        寫《白色巨塔》出名hit位日本作家山崎豐子,伊另外根據真人真事描寫日本某一間航空公司為tio̍h追求利益kah形象,無顧飛航安全,打壓beh挖空檢舉弊案的工會幹部,結果造成悽慘的超大型空難事件,伊寫出一本《沈的日頭》的冊。Che就是無《歕啡仔人保護法》的悲哀。

        美國有三位小姐分別佇世界通訊、安隆企業kah聯邦調查局,將大企業kah政府機關內部垃圾代誌挖挖出來,短期間雖然造成公司信譽破產甚至倒店,但是長期來看,卻是͘美國檢討會計制度,大大滅少企業烏白亂舞的空間,對大眾利益、經濟運作貢獻誠大,致使美國《時代雜誌》選chit三位小姐作2002年時代雜誌風雲人物,封信三位小姐相片頭前印足大大字〈歕啡仔人〉。

        無論佇私人的公司機構,抑是政府機關工作,咱傳統文化強調個人對團體tio̍h忠誠、對頂司tio̍h絕對服從,煞變作無管是非。若是有員工為tio̍h良心不安抑是為tio̍h公眾利益去挖空,in的命運攏是真可憐。聽法務部長講beh學英國美國日本等先進國家擬訂《歕啡仔人保護法》,相信m̄-nā立法委員無分藍綠,連全民攏會phok-á、齊聲喝:讚!

 

 
< Prev   Next >