首頁 arrow 綠色短評 arrow 中國開始beh佇香港下毒

中國開始beh佇香港下毒 PDF 列印 E-mail
發表者 李南衡   
2012/07/27, Friday
        香港政府按算ùi今年九月開始,beh kā「德育kah國民教育」作一科,納入小學課程。引起社會激烈反對,教師kah家長是反對國民教育,是反對教材內容過頭偏差。有五千外名家長聯合起來組成「國民教育家長關注組」,七月二三,佇香港報紙刊登聯署聲明,無應該今年九月beh佇小學推行的德育kah國民教育。連署人包括樞機主教陳日君、資深律師、時事評論員等三十外名社會人士。七月二九舉行反對「洗腦教育」遊行,有萬外人參加。

 

        中國國民黨kah中國共產黨chit兩個雙生仔黨無sêng免錢,中國國民黨走路來台灣的時,靠「戒嚴」所實施的「白色恐怖」,佇台灣無論按怎灌輸「大中國」思想、黨國體制教育,都無人敢反對,啥人若哼一聲,可能就失踨甚至無命。中國共產黨看kah嘴瀾水chhop-chhop tin,中國國民黨那會chiah gâu有法度台灣人教育kah變作奴隸?原來是偷the̍h中國共產黨hit套「洗腦」的工夫。

        好佳哉,今仔日的香港不比早前戒嚴下的台灣,mā m̄是早前管死死的中國,無可能想beh按怎就beh按怎。香港回歸中國十五年ah,中國頭人對香港現狀愈看愈順,想beh改變香港人的思想觀念。改變的對象當然是愈細漢愈好,ùi小學開始而後推到中學。毒品當然需要一個khah súi的包裝,頂面印「國民教育」四大字,啥人會使反對「國民教育」?無,香港人反對的是由一陣紅色背景真強的學者所製作出來的教材,反對的是chit-ê「國民教育」的方向傷過偏激,干單紹介中國政權好的一面,講「中國共產黨是一個進步、無私kah團結的執政團體」;無beh講民主、人權chit類普世價值觀念,顚倒講美國是一個「政黨惡鬥、人民tio̍h災」的國家。小學生有可能曉問,但是大人一定會問,是按怎hiah呢好的中國的官員攏某囝錢財送去hiahbái的美國咧?

        教材的內容連左派教師工會香港教育工作者聯會(簡稱「教聯會」)所做的調查顯示,只有三葩的小學教師有信心thangchit-ê科目,香港教育局beh按怎說服人兩個月後全港小學beh推行國民教育咧?教育局長吳克儉佇電台節目中批評教材「內容有偏差無公正」,伊講,雖然按呢,無需要停止國民教育。教育局常任秘書長謝凌潔貞講,教材內容雖然有偏差無公正,但並是全部內容攏不可取。伊講,按呢會tàng hō͘學生囡仔「多角度思考」。

        今仔日bē tàng「一手遮天」lo̍h,科技kah傳播工具chiah發達,啥物代誌密;已經是靠一個教材tio̍htàng kā學生囡仔洗腦lo̍h。雖然是按呢,咱猶原熱烈支持香港的家長、教師kah社會人士,徛出來反對中國佇香港下毒!

 

 
< 前一個   下一個 >