首頁 arrow 綠色短評 arrow 白賊講久,ma7 be7變作真e5!

白賊講久,ma7 be7變作真e5! PDF Print E-mail
Thursday, 03 April 2008
  四月初一,新當選總統e5馬英九及阿扁總統會談,兩人講講一下,有「九二共識」抑無,煞變作會談e5重點,實在真好笑。 一九九二年hit當時e5總統李登輝先生、及hit當時主導及中國會談e5海基會董事長辜振甫先生攏講過,無彼號啥物「九二共識」。現代資訊科技chiah發達,m7信e5人,隨時會使去國家圖書館抑是各大學圖書館尋舊報紙,ui3一九九二年直直尋,尋到二000年四月,看台灣有to2一份報紙曾出現過「九二共識」chit個名詞?無!攏尋無!因為二000年四月總統大選民進黨選贏、五月二十新總統就任進前,原本擔任陸委會主委e5蘇起先生,無ka7李登輝總統報告,就將家己發明e5「九二共識」chit個名詞大主大意公佈出來。   趣味e5是中國國民黨ui3二000年失去政權以後,若講tioh8民進黨政府無繼續及中國會談,就ka7責任推捒hou7民進黨政府,講in無欲照「九二共識」來行,中國才會無愛及台灣會談。講到那像有影咧!白賊講一下久,連新當選總統e5馬英九ma7相信有chit個「九二共識」。   Koh khah好笑e5是三月二九,人ti7寮國訪問e5中國總理溫家寶ma7講:希望海峽兩岸ti7「九二共識」e5基礎上恢復協商及談判。   白賊講久,那像是真e5!卻是真正會害死人,早前台灣就曾按呢受害過。六十四冬前e5一九四三年十一月二七,美國總統、英國首相、中國國民政府主席ti7埃及首都開羅舉行會議。Ti7仝年十二月初一,有一篇無人簽名ma7無註明日期e5新聞公報,發表ti7中國對日作戰宣言內底,國民政府講白賊講he是「開羅宣言」。內底有一點講:日本占據e5中國所有領土,包括ti7清朝割讓e5台灣、澎湖及東北地區,歸還中國。國民政府不但提白賊話作宣傳、ma7按呢教育學生及人民,致使幾十年來chit個講久e5白賊話,那像是真e5!一直到台灣政黨輪替,挖出總統府及外交部e5檔案,才知影hou國民政府騙五六十年。悲哀e5是,中華人民共和國主張台灣是中國e5領土,ma7是提chit個白賊話作基礎,那像中國總理講希望海峽兩岸ti7「九二共識」e5基礎上恢復協商及談判。 兩項代誌仝一款e5是,攏提彼號無e5、白賊e5代誌作基礎講欲來做啥。明明都無e5代誌那會使提來做啥基礎咧?上害e5是中國國民黨及中國共產黨chit兩個雙生仔黨,攏相信家己講e5白賊話。上可憐e5是in白賊講一下久,不但連家己都相信he是真e5,koh欲強逼別人相信。 歷史hou7咱e5教示是:白賊講久ma7 be7變作真e5!
 
< Prev   Next >