首頁 arrow 綠色短評 arrow 奧林匹克世運金牌算作啥?

奧林匹克世運金牌算作啥? PDF 列印 E-mail
發表者 李南衡   
2012/08/03, Friday
        八月初一,2012年倫敦奧林匹克運動會傳出一個真bái的消息,世界羽毛球聯合會宣布取消八位運動員的比賽資格,因為in tī前一工的比賽中thiau-kang拍輸,世界羽毛球聯合會指控chit八位選手「無盡力behtio̍h比賽,in的表現真明顯損害tio̍h羽毛球運動。」Chit四對選手包括中國選手于洋/王曉理、韓國選手鄭景銀/金荷娜、河貞恩/金旼貞、kah印尼選手波莉/喬哈里。排名世界第一的中國選手組于洋/王曉理故意輸͘韓國選手鄭景銀/金荷娜,全場6,000外名買票來看比賽的觀眾大聲喝咻、開汽水!抗議選手thiau故意失誤連連放͘輸。事後,于洋有解釋講,in無想beh佇小組賽用傷濟氣力、是為tio̍h beh留一寡體力佇後面的比賽。甚至有人替in辯解講,因為是小組賽並是淘汰賽,in按呢作並無違反比賽規則,顚倒是一種聰明的策略戰術。

 

        In按呢作,完全是為tio̍h金牌,煞奧林匹克世運的精神放記得。奧林匹克的精神是比賽「koh khah緊、koh khah懸、koh khah強」,m̄-nākah對手拼,koh khahkah家己比,超越家己,超越體力的極限,追求的是公平的競爭。In mā完全記得國際奧林匹克主席羅格本屆開幕式致詞中所講的一句話:「嬴tio̍h勝利並無重要,重要的是你按怎比賽!」

        奧林匹克世運金牌那會無重要?金牌是全世界上優秀運動員所夢想的、所追求的,每四年才有一遍機會,當然是非常重要。致使有少數第一流的選手為tio̍h成績會tàng koh khah好、會tàngtio̍h金牌,去偷食禁藥。Hông檢查出來當然失去比賽的資格,真無彩,何mih苦咧?其實inmài食禁藥,原本真有可能得tio̍h獎牌、甚至得tio̍h金牌。

        有的國家囡仔準作機器來訓練,為tio̍h國家的利益會使犧牲個人的幸福,自細漢就kā tia̍p kah流血流滴,完全無囡仔準作人來訓練。替中國體操得tio̍h奧林匹克世運第一塊金牌、為中國體操隊the̍h過二十幾個世界冠軍、今年mā koh chhoā中國男子體操隊the̍h tio̍h奧林匹克世運金牌的中國體操隊總教練黃王斌講:「中國體操目前上重要的任務,就是tio̍h改變『苦、thiám、傷』的傳統形象,若無,會影響體操運動的推廣kah發展。」

        咱看一寡集權獨裁國家佇體育方面拼生死、想講得tio̍h愈濟金牌、國家愈有面子。但是in完全無瞭解,一個國家有傑出的運動選手並bē-tàng說明政治文化比別人khah好,顚倒hông看出一種無自信kah道德的缺陷。

        拼金牌、拼金牌,若無顧tio̍h人的尊嚴,金牌算作啥?

 
< 前一個   下一個 >