首頁 arrow 綠色短評 arrow 香港人是按怎會反洗腦?

香港人是按怎會反洗腦? PDF Print E-mail
Written by 李南衡   
Friday, 07 September 2012
九月初一,香港有真濟中、小學生自發地去香港政府總部外面參加示威「開學典禮」,反對政府實施「洗腦教育」。今年七月已經有九萬香港人出來參加反洗腦大遊行,希望政府今年九月起beh作獨立科目的「德育kah國民教育」撤回,真濟人煩惱「國民教育」是洗腦教育。但是香港政府決定「國民教育」ùi今年開始先佇小學試辦三年。囡仔kah家長真無奈才tio̍h去政府總部頭前示威抗議。

 

香港政府那會趕緊beh實施「國民教育」?因為北京的頭家愈來愈無滿意香港已經回歸祖國十五年ah,是按怎人心、思想猶未完全回歸?所以香港政府才會緊beh香港人洗腦。大人khah歹洗腦,所以決定ùi小學生下手,而後才對中學生。香港真濟人是共產仔建國了後,才千辛萬苦偷渡來香港的,共產仔生作啥物款,免騙免瞞la̍h。看tio̍h教材講:中國共產黨是「進步、無私kah團結的執政集團」、是「理想體制」,同時批評美國民主制度是「政黨惡鬥」而且「影響民生」。英國殖民統治香港,雖然無平等但是有充分的自由;雖然無選舉制度的民主但是有法治,雖然無法度培養傑出的政治領袖,但是造就一寡真gâu的生理人、專業的精英,kah廉潔高效率的公務員。中國雖然已經成作世界第二經濟大國,但是猶原是「人治」並是「法治」的國家,貪污腐化的共產仔那是「進步、無私kah團結的執政集團」?美國若hiah bái,是按怎中國的大官kah大好額人,攏某子送去美國,幾億幾億貪污的錢拼拼提去美國咧?

香港人是按怎反對洗腦,因為真濟香港人本人抑是親友bat佇中國體驗過,而且現代資訊發達,當然知影洗腦的厲害。洗腦是一個執政者通過各種手段改變一群人的信仰抑是行為,洗腦有強制性、長期性、kah無法度拒絕伊的特色。獨裁者相信「白賊話若加講幾遍,就會變作真理。」甚至連講白賊的人家己mā kā白賊話當作真的。中國國民黨kah中國共產黨chit對雙生仔黨,別項曉、洗腦第一名。香港人看中國國民黨佇白色恐怖時代台灣人洗腦洗kahmà-mà,致使腐敗的中國國民黨今仔日猶teh作總統!莫怪香港人拼死mā tio̍h反洗腦,莫怪香港特首梁振英緊出來兩遍講:國民教育是洗腦。

上感動人的是一寡中學生組成的「學民思潮」的成員徛出來,佇論壇頂gâu討論koh會演講,感動真濟老師、家長kah市民。佇絕食抗議的成員中有中學生加入。Chit遍的示威運動,ùi八月三十開始到ta已經超過一禮拜,每工攏有四千人至八千人,九月初一拜六暗上濟人有四萬外人。囡仔縛頭巾頂面有貼一張標仔印:「無愛洗腦」!真正代表大多數香港人的心聲。

 
< Prev   Next >