首頁 arrow 綠色短評 arrow 中國外交官管人美國的壁!

中國外交官管人美國的壁! PDF Print E-mail
Written by 李南衡   
Friday, 14 September 2012
九月初十,英國廣播公司(BBC)有一條新聞講,美國一個小鎮拒絕中國駐美官員所提出的要求:拆除當地一棟建築物外壁頂面所掛的「台獨」的壁畫。

 

美國西北部奧勒岡州的中西部,有一個叫作科華利斯(Corvallis)的小鎮,講小mā m̄ 是特別細的小鎮,因為有奧勒岡州立大學設佇chia。中華人民共和國駐舊金山領事館副領事張浩,頂個月有去chit-ê小鎮chhoē鎮長,抗議講chit-ê鎮內一堵壁,有掛「台灣獨立」的字樣kah圖樣。張副領事見朱莉.曼寧(Julie Manning)市長kah市政管理經理帕特生(Jim Patterson)的時,提交一份抗議批,表示:「世界干單有一個中國,台灣kah西藏攏是中國的一部分。」koh強調講,中國kah奧勒岡州有堅強的經濟文化關係,設使科華利斯鎮若會tàng kah領事館合作,會有真濟好處。伊佇抗議批裡講:chiah-ê壁畫已經「引起當地華人社區的強烈反感。」要求掛佇壁頂chiah-ê壁畫tio̍h拆落來。朱莉.曼寧市長伊講:「美國憲法第一條講,保障佇chit-ê國家的言論自由,包括藝術表達的自由。」朱莉.曼寧市長kah市政管理經理帕特生攏當面表示:Bē tangbeh拆除hit堵壁頂的壁畫。不過in有答應,會將中國方面的意見轉達͘建築物的主人。帕特生有向當地的報社表示,中國方面認為hit堵壁畫是政治宣傳,所以要求拆除。

建築物的所有者是台灣出世的林銘新,chit堵闊一百尺、懸十尺的壁畫,除了有畫代表台灣精神的水牛、阿里山、101大樓,kah幾那粒寫「獨立」、「和平」的天燈,kah支持台灣獨立字樣以外,猶有畫中國警察拍西藏人kah西藏喇嘛家己放火燒死的畫面。Chit堵有寫「請支持台灣獨立」的壁畫,是由台灣來的畫家趙宗宋先生kah另一位台灣出世、現此時住佇加拿大的畫家盧月鉛小姐共同創作完成的。盧月鉛接受《美國之音》訪問的時講,徛佇人道的立場,美國人對西藏喇嘛通過家己燒死來爭取自由chit號悲劇非常重視,所以in才會用爭取自由來作in佇壁畫頂面想beh表達上主要的概念。

 

聽講中國領事館官員有直接聯絡tio̍h林銘新本人,林銘新有當地的報紙《科華利斯報》講,伊厝裡的人確實有煩惱,若是去中國有可能會͘ in報復。不過林銘新表示,伊無按算beh拆除hit堵壁頂的壁畫,伊家己講,伊是自由西藏kah台灣獨立的支持者。

中國掠準全世界攏tio̍h hō͘伊管。台灣有一句俗語話講:「五里鴟鴞beh管七里雞。」意思是講:食傷飽、管傷濟lah!全美國各所在見若有大堵壁的台灣人,攏來畫類似的壁畫,咱才來看中國beh按怎抗議,相信會真鬧熱!

 
< Prev   Next >