首頁 arrow 綠色短評 arrow 白賊國無容允講實在話的人!?

白賊國無容允講實在話的人!? PDF Print E-mail
Written by 李南衡   
Friday, 19 October 2012
安徒生童話有一篇《國王的新裳》,是講有一個國王真愛súi,定定都穿新裳。久來,城裡的裁縫師父已經無法度滿足伊ah,有一工來兩個騙仔,講in-ê織工kah手工會tàng織出世界獨一無二、極súi無比的布料,干單巧巧人才看有、愚戇的人看bē-tio̍h,兩個騙仔佇無半項物件的織布機頂面無閒幾若工,國王派幾個大臣去看in織布的進度,幾個大臣看in兩個無閒chhih-chhih以外,啥物布料無看tio̍h,但是無人敢承認家己是愚戇的人,幾個大臣轉去向國王報告攏講in所織的布料實在有夠súisúi kah無話講。過幾工,新裳作好ahthe̍h來獻͘國王,眾大臣攏阿老súi,國王明明無看tio̍h半項,但是驚hông講是愚戇,歡歡喜喜͘ chit兩個騙仔伊穿根本啥攏無的新裳。穿了koh 遊街͘人民看。結果是一個天真的囡仔大聲喝講:國王無穿裳!

 

美國免簽證chit項代誌,十月初十雙十節hit工馬英九總統佇演講中猶tā-tā叫,那像是天大地大的政績。無疑誤仝一工,衛生署疾管局副局長施文儀佇伊的面冊頂面講美國免簽證是真正免簽證,是「電子旅遊授權書」(ESTA),真正免簽證是「機票買tio̍h、護照the̍h leh就會tàng飛去。」伊減講一句:國籍唯一的選擇tio̍h填“Taiwan”。按呢ah,講伊是「國慶放砲」!另外,伊反對來台灣讀冊的中國學生納入「全民健保」,伊講in是「全民」,外籍人士自了m̄-bat納過一角銀稅金,kah「全民」有真大的差別。

考試院長關中講,公務人員是一般人,言論自由有受相關法律限制,使隨便表達政治立場抑是意識形態。伊講疾管局副局長施文儀最近佇面冊的發言無適當,已經違反公務人員的倫理kah紀律。中國國民黨籍立委吳育昇罵講施文儀已經違背「行政倫理kah基本的官箴」。中國國民黨籍立法委員費鴻泰質詢講施文儀「根本就是抓耙仔!」質疑行政部門猶有其他官員有問題,「施文儀我掠出來!」hông感覺足好笑,莫怪行政院長陳沖無應答。

 

beh問的是:施文儀講話的內容有錯誤無?有歪曲事實無?若無,伊有啥物罪?美國免簽證kah來台灣讀冊的中國學生納入全民健保,根本是伊主管的業務,按呢伊敢有違反公務人員服務法?若無,in講啥物屁話!講伊「已經違反公務人員的倫理kah紀律。」講伊已經違背「行政倫理kah基本的官箴。」啥款倫理?一條紀律?啥物官箴?拜託͘咱鼻芳一下。

白賊九仔作總統、白賊義仔作副總統,敢講按呢歸個「中華民國」tio̍h已經變作一個白賊國ah,講白賊的笑微微,講實在話的人tio̍h處罰,真過份!

Last Updated ( Friday, 19 October 2012 )
 
< Prev   Next >