首頁 arrow 綠色短評 arrow Chit 款e5統戰,你想按怎?

Chit 款e5統戰,你想按怎? PDF 列印 E-mail
2008/04/15, Tuesday
別項m7敢講,但是若講tioh8統戰,中國共產黨爭拼第一。聽講ti7五月二十台灣新總統就任hit工,中國有可能會宣佈,向台灣的飛彈欲撤走一半。一半是偌濟?現此時一千四百外粒e5一半是七百外粒,差不多是二000年hit陣飛彈總數二百粒e5三倍半,ma7是一九九六年開始部署發彈hit陣四十粒e5十八倍外。Chit款e5撤走法,你感覺按怎? 中國講欲撤走飛彈,那像我做囝仔e5時陣tioh8 malaria,三兩工、無張無持就發燒一擺,無代無誌就寒到欲死。二000年,中國頭人江澤民為tioh8欲說服美國停止銷售武器hou7台灣,對美國布希總統講,恁講賣武器hou7台灣是為tioh8防衛台灣e5安全,我若撤走向台灣e5飛彈,請美國mai3 koh賣武器hou7台灣來作交換條件,你看按怎?美國當然m7是戇人,你ka7飛彈ui3大門口撤去邊仔門有啥物差別?所以就無答應。二00五年四月,一下聽講當時台灣e5中國國民黨主席連戰欲去中國訪問,中國ma7 koh釋出善意講欲ka7飛彈撤khah退後一絲仔,就是講原本安ti7福建廣東浙江江西等所在e5飛彈,會使撤退去比較khah內陸e5所在。但是,事後證明,這ma7是風聲一陣。M7但無撤退,koh ti7 hit冬開始部署威脅性koh khah大e5巡弋飛彈。     現此時中國m7但有東海十號巡弋飛彈、猶koh有長程e5地對地飛彈,射程ui3一兩千公里到八千公里不等,這當然m7是完全針對台灣來裝設e5。日本、韓國,北朝鮮、俄羅、東南亞國家、印度,甚至美國,攏會驚neh!所以二00五年七月有新聞報導講,日本為tioh8防備中國飛彈e5威脅,欲ti7埼玉縣人間基地、岐阜縣基地、及九州e5春日基地,安裝部署愛國者三型發彈,而且欲及美國進行新一代飛彈防禦系統。   中國若是有影撤走七百外粒向台灣e5飛彈,馬英九及伊e5支持者,千萬m7 thang想講這是中國對馬英九及中國國民黨釋出e5善意,甚至因為按呢煞來相信中國有影是「和平崛起」的。「撤走」e5意思是徙khah遠一絲仔,mai3講現代交通工具chiah發達,一兩工內欲按怎運輸攏無問題。其實就是徙去khah倚內陸幾省e5所在,若欲、ma7是拍會tioh8台灣。真正欲表示善意,m7是「撤走」掉,應該是「銷毀」掉。每一年每一年「銷毀」掉一寡,目標十年八年攏總「銷毀」掉,才會tang3講是有誠意。   若是干單「撤走」、ka7飛彈撤khah遠一絲仔,chit款e5作法你敢會ka7阿老?chit款e5統戰,你敢會接受?
 
< 前一個   下一個 >