首頁 arrow 綠色短評 arrow 美國中國換頭人,那會差hiah濟?

美國中國換頭人,那會差hiah濟? PDF 列印 E-mail
發表者 李南衡   
2012/11/09, Friday
聽講chit遍總統副總統大選是美國歷史上拼了上激烈、競選費用開上濟的一遍。台灣時間十一月初七早起beh晝,有線電視CNN報導Obama the̍h tio̍h二百七十四張選舉人票,當選美國第四十五任總統。因為二百七十票tio̍h超過總票數的一半。最後統計伊the̍h tio̍h三百0三張選舉人票、Romneythe̍h tio̍h二0六票,那像兩旁比得,其實全國普選的總票數才差兩葩 niā-niā。美國傳統的總統選舉方式有in-ê優點kah缺點,但是知影選舉結果了後,Romney隨時宣布家己落選、祝賀Obama當選;當選的Obama隨時宣布beh邀請Romney商談國事,koh講:支持Romney的選民,恁的聲音我有聽tio̍h。當然是中國媒體所評論的,講啥物「美國總統選舉制度鼓勵民粹,政黨kah政治人物漸漸變作民粹的俘虜。」抑是講「付出kah食苦變作無意義,為tio̍h選舉國家整體的進步煞匟佇次要的位置。」煞講「有中國特色的民主之路,是民主新路。咱愛的是和平、穩定的民主政治,咱無愛暴力連連、社會動蕩;咱愛的是和諧的民主發展,無愛國家分裂,一盤散沙;咱愛的是繁榮發展的民主建設,無愛經濟擋恬、生活倒退。」

 

莫怪有媒體評論講:中國媒體批評美國總統大選,那像太監teh看人娶新娘講新娘無夠súi、講新娘行路無大段。

 

美國總統大選,是影響全世界的一件大代誌。仝款影響全世界、受注目的另外一個大國-中國teh換頭人。

 

美國總統選了的第二工,也就是十一初八,中國共產黨第十八次全國代表大會佇北京人民大會黨開幕。二千二百六十八名代表,代表全國八千外萬的共產黨員。免選舉,幾個月前tio̍h知影此後十年中國的頭人是啥人;十一月十五,第四代頭人胡錦濤kah溫家寶會正式大權交͘第五代頭人習近平kah李克強。中國的頭人beh換啥人?全國人民干單會tàng恬恬看;敢是全體共產黨員決定的?是。敢是二千二百六十八名黨代表所決定的?是。in去開會進前人tio̍h決定了ahsiáng決定的?iah會知。in去開十八大是去創啥?去夯手表示贊成ah

十年前,胡錦濤kah溫家寶上台,中國人是對in兩個有真大的期待,事實上證明無論換啥人,攏是留仝款染kah烏烏烏的頭鬃型,所講的話無啥精差、話講起來lò-lòkoh m̄teh講啥。咱知,若是共產黨對行政、司法、立法三大部分保持絕對的權威,官員的腐敗tio̍h會愈來愈無救,官員kah官員所構成的貪污腐敗網tio̍h會愈ân愈無可能tháu,佇中國特色的民主下面,黨官kah in的第二代第三代也就是所謂的「太子黨」,會國家的財富吞食了了!

 
< 前一個   下一個 >