首頁 arrow 綠色短評 arrow 馬英九的嘴phé出在人搧!

馬英九的嘴phé出在人搧! PDF 列印 E-mail
發表者 李南衡   
2012/11/16, Friday
Chit幾年,馬英九自作孽愛搧家己的嘴phé,莫怪人愛搧伊的嘴phé

 

1992年,行政院陸委會副主委馬英九講,兩岸之間那會無共識?因為「(中國)海協會明知雙方對有關『一個中國』的表述問題並無交集,卻對外一再放調講雙方已經獲得共識。」2011年八月二八,馬英九總統講伊:「堅持九二共識kah三不政策。」馬英九總統搧馬英九副主委一個嘴phé。

2008年總統競選期間,馬英九講伊的政見「六三三」(經濟成長率6%以上、失業率3%以下、國民所得美金三萬以上)若無達成,beh捐出薪水的一半。2010年十月,伊的政見無一項達成,人叫伊tio̍h照呼照行。馬英九總統激皮皮講:「捐款並bē-tàng解決問題。」馬英九總統搧馬英九一個嘴phé。

2012年三月,吳伯雄代表政府去中國開會,伊擲出「一國兩區」的論點,佇台灣hôngkah臭頭,馬英九總統緊切割講chit件代誌kah伊無關係。五月,總統就職典禮,馬總統講:「一國兩區是憲法定位的。」家己搧一個嘴phé。

2007年七月初四,貓空纜車落成hit工,馬英九kah台北市長郝隆斌做夥坐纜車的時講:「我是干單會曉走niā-niā,我會曉起貓纜。」2008年九月底風颱,猫纜有基座͘雨水沖kah落一大孔,差不多有成人懸。經專家鑑定有安全顧慮,十月初一起停駛,到2010年三月才koh恢復經營。Chit中間馬英九總統派監察委員徹查。2009年七月二一,監察委員報告講:「馬英九擔任台北市長期間,並無實際涉入興建貓纜的決策,實際主持會議kah作決定的攏是前台北市政府秘書長陳裕章。」監察委員搧馬英九總統一個嘴phé。

2008年總統大選的時,馬英九拍電視廣告罵民進黨執政期間,大學畢業生起薪干單兩萬六千七niā-niā。當選了後的2010年,馬政府的勞委會主委王如玄講:「大學畢業生會tàng22K(也就是兩萬二)已經bē-bái ah,有人連一角錢都無。」勞委會王如玄主委搧馬英九總統一個嘴phé。

 

2012年十月三十一,行政院長陳沖佇立法院答詢的時,回答立委質詢馬總統六三三政見跳票,那會無捐薪水的一半?陳院長講,馬總統bat對伊講,伊捐款的總額已經超過薪水的一半。第二工,總統府發言人講:「馬總統自了m̄-bat講伊的捐款超過薪水的一半。」搧陳沖院長一個嘴phé。陳沖院長講:「馬總統講逐年都有捐大約七千五百萬。」Chit遍總統府無講啥,顚倒是電視名嘴接續落去講:「馬總統每個月薪水攏有入數,請公布七千五百萬的錢是ùi tó位來的?財產來源不明哦!」逐個相爭搧馬英九總統的嘴phé。

 
< 前一個   下一個 >