首頁 arrow 綠色短評 arrow 二二八消失的台灣青年學生

二二八消失的台灣青年學生 PDF Print E-mail
Written by 李南衡   
Friday, 23 November 2012
十一月初九起到十二月初九,佇台北市南海路「二二八紀念館」地下室,有「二二八事件kah青年學生特展」,值得咱每一個台灣人去參觀去思考。

 

佇展覽中,咱會tàngtio̍h真稀罕、真珍貴的文物資料kah相片。像講二二八事件發生當時,台灣各所在學生投入示威遊行的相片;像講當年延平學院的學生證kah校徽胸章,校徽頂面有一隻「火金姑」,延平學院創辦人朱昭陽博士希望延平學院的學生會tàng͘黑暗中的台灣一點光明。可惜chit間第一間由台灣人創辦的大學二二八事件了後,͘中國國民黨政府關門;日治時代領導台灣民族運動的蔣渭水先生的第三後生蔣時欽,因為二二八事件了後成立「台灣省青年自治同盟」遭受通緝逃亡經香港去中國,chit遍,伊的查某子有帶當時走路離開台灣所使用的皮箱、手表等遺物轉來參加展覽。

chit遍展覽會特別ùi 1920年代的台灣校園學生運動講起,台灣人接受新式教育,才開始受世界性的民主思潮、住民自決思想的影響,對專制政權的抗爭kah為爭取人民權益拼生死,致使hit當時台灣校園發生過khah有影響力的學生抗議事件至少有九遍。͘現代的青年學生知影,台灣青年學生關心社會、關心台灣前途,是忽然間窋(puh)出來的,是有伊的優良傳統。

二二八事件,台灣人有偌濟人犧牲生命?到今仔日雖然猶無一個定案,總是逐個相信有18,000人至28,000人,koh khah無法度知影的是內底有偌濟青年學生。高雄第一中學(今仔日的高雄中學)遭受軍隊幾門迫擊砲轟擊,學生組成自衛隊,而且有高雄工業、高雄商業學生加入,高雄女中學生提供食物。而後高雄第一中學生kah軍隊拼「巷戰」,死傷慘烈。中國來的援軍ùi基隆kah高雄上陸了後,開始大規模掃射佇街路的民眾,內底有偌濟青年學生mā m̄知;受軍統局號召參與維護治安工作的台北學生百外名,͘軍隊押去圓山倉庫廣場前集體銃殺,叫作「圓山事件」。軍隊進攻台北市二二八處理委員會,佇中山堂現場有開南商工kah延平學院學生150人至250人遭受銃殺,棄屍佇第六水門。

展覽中的「學生軍kah治安隊」,提起事件發生了後真濟警察驚kah走去匿(bih),真濟學生投入維護治安的行列,甚至成作維護治安的主力。但是中國國民黨政府派兵增援來台灣了後,第一個下手的就是整頓全台灣中等以上的學校,若koh加日後的「清鄉」屠殺,啥知影有偌濟青年學生受害犧牲?

 

二二八消失的台灣精英,可能͘台灣退步二十年;二二八消失的台灣青年學生,有可能͘台灣慢進步二十年。可憐可敬的台灣青年學生,阮永遠數念恁!

 
< Prev   Next >