首頁 arrow 綠色短評 arrow 馬英九那會假死tèⁿ無事?

馬英九那會假死tèⁿ無事? PDF Print E-mail
Written by 李南衡   
Friday, 30 November 2012

最近中國新版護照內底簽證的空頁,有印中國的地圖,印度中國兩個有爭議的地區kah台灣,歸個西沙kah南沙群島在內一寡有爭議的區域攏印入去,準作中國的版圖,引起印度、越南、菲律賓的抗議;佇中國新版護照內第43頁頂面有印台灣的日月潭、瑩光防偽圖案有印台灣另一個景點清水斷崖,算作中國風景圖片。總統府命令陸委會tio̍h提出抗議,陸委會抗議講中國新版護照:納入我國領土kah風景圖片,是完全無顧tio̍h事實、挑起爭議的作為,而且傷害兩岸近年來努力建立的互信基礎、kah台灣兩千三百萬人民的感情,中華民國政府絕對接受。陸委會希望大陸面對爭議tio̍h自我節制、愛有智慧,避免͘外界片面改變現狀的感覺,煞來造成雙方互動發展的障礙kah倒退。

 

chiah呢軟siô-siô的「抗議」,中國完全無看在眼內,顚倒搧馬政府一個嘴phé。中國國台辦發言人楊毅講:Chit件具體事情並無存在台灣方面所講的挑起爭議、改變現狀問題;中國kah台灣「仝屬一個中國,che是阮一貫的立場。」陸委會講會koh繼續溝通,咱實在知嘴phé hông搧了beh溝通啥?

 

印度佇簽發͘中國公民的簽證的時加下一張印度版的新地圖,有爭議的兩個地區印佇頂面;越南佇中國旅客新版護照內底,有印一個「牛舌線」(台灣kah歸個西沙kah南沙群島在內一寡有爭議的區域攏畫佇內底的「南海九段線」的地圖)hittǹg「取消」兩字,另外加紙簽證;菲律賓強烈抗議中國新護照內底的地圖,拒絕佇新護照頂面簽證,由菲律賓海關另外發簽證申請表格。

上好笑、上可惡的是中國鴨霸在先,才koh講中國新護照是符合國際標準,並是針對某一國,希望各國會tàng「理智對待」,m̄-thang因為按呢來阻礙「中外交流」;中國外交部發言人呼籲相關國家m̄-thang「過分解讀」中國新版護照。

 

是按怎馬英九總統͘英國《經濟學人》雜誌講是「戇呆」(bumbler),tio̍hphut-phut,台灣͘中國新護照畫入去中國版圖chiah大條的代誌,顚倒假死無事?͘我想起第二次世界大戰戰後無偌久,有ùi中國來的少年人,頭鬃抹油油,逐工se-bí-loh穿kahphiat,四界jiok媠查某囝仔。Hit陣聽一寡老大人罵講:不鬼!chit種人「驚跋落屎礐,驚火燒厝。」問講chit句話是啥意思?老人解說講:伊一箍人全家伙干單hitse-bí-loh,伊顧的是面子niā-niā,跋落屎礐choán食的家俬tio̍h去了了ah!奇怪,伊那會驚火燒厝?老人應講:厝是伊的,是暫時借住的,伊驚啥?Hit陣囡仔人聽無啥有。活到七八十ah,看馬英九按呢舞,才完全瞭解四界騙食的人的心態。

 
< Prev   Next >