首頁 arrow 綠色短評 arrow 馬政府chit-ê超級詐騙集團!

馬政府chit-ê超級詐騙集團! PDF Print E-mail
Written by 李南衡   
Friday, 07 December 2012
今年九月,民進黨立委管碧玲質詢交通部長毛治國的時指出,交通部所屬國營事業的退休人員年終慰問金竟然有十外億。Ùi chia才挖出來,原本退休的軍公教人員是依據「公務人員退休法施行細則」發的,但是tī 2010年十一月,考試院銓敘部認為無合時宜,tio̍h刪掉chit項依據。啥知刪掉兩年ah,馬政府逐年照常開202億來支付月退軍公教人員的年終慰問金。行政院chiah呢無理無法的開錢,引起全國人民kah輿論一面倒的攻擊。

 

十月二三,小可驚tio̍h的行政院長陳沖佇立法院答詢的時宣布講:將來原本月退休俸領兩萬以下的退休人員抑是遺眷,kah因為作戰演訓受傷死亡殘廢的退休人員抑是遺族,chit兩大類人士會tàng領年終慰問金,大約有四萬兩千人thang領,差不多會發十億。按呢一聲tio̍h替財政困難、負債累累的馬政府減開一百八十二億,所有的輿論攏喝「讚!」陳沖行政院長若像頭一擺做tio̍h代誌,m̄-nā馬英九總統第二工公開阿老陳沖講「我感覺相當快速、睿智」,連民進黨、台聯黨、親民黨攏贊成陳沖行政院長的作法。

無疑誤桃園選出的中國國民黨立委孫大千跳出來講伊代表選民反對,開始立委聯署要求行政院使廢掉退休軍公教人員年終慰問金,續落去,中國國民黨籍的立委一個一個提出無仝的版本,有參照行政院版本改作月退俸兩萬至三萬的發一半,三萬以上的發兩成,發放的人數ùi四萬人增加到四十三萬人,錢ùi十億增加到四十三億。有人懷疑是中國國民黨食西瓜半暝反症。錯了!錯了!

 

Che完全是馬政府chit-ê詐騙集團的詐騙手法。用腳頭趺想知影,若無中國國民黨主席馬英九tìm頭,叼一個不分區立委敢烏白講siáu話?若無馬主席授意,行政院下面的退輔會主委曾金陵敢公開對伊的頂司行政院長陳沖唱聲?敢講hit號戇話:「政府應該kah退伍軍人擴大對話」嗎?伊敢知影行政院退輔會是政府嗎?是按怎伊無去kah退伍軍人擴大對話咧?若無馬主席同意,行政院下面的國防部長高華柱敢公開對伊的頂司行政院長陳沖大細聲嗎?講啥物「無法源是政府的代誌」,伊敢是講國防部是政府?

 

ta兩個月過去ah,一個退休軍公教人員年終慰問金猶chhâu bē好勢,猶koh講一個新版本,今年暫時照行政院版,明年景氣若好才koh來放寛條件。到底是teh騙全國人民?抑是teh騙退休的軍公教人員?che m̄是馬政府無能,是thiau工由行政院poa白面,由立法委員poa烏面,由馬總統poa白面,由中國國民黨馬主席poa烏面,明明是一個金光黨超級詐騙集團的本質,實在可惡!

 
< Prev   Next >