首頁 arrow 綠色短評 arrow 真正了不起的韓國總統朴槿惠!

真正了不起的韓國總統朴槿惠! PDF 列印 E-mail
發表者 李南衡   
2012/12/21, Friday
十二月十九,朴槿惠女士以五十一點六葩的得票率,得tio̍h超過半數韓國人的支持、當選第十八任大韓民國總統,咱足歡喜伊祝賀。因為朴槿惠會tàng當選韓國總統,實在是非常無簡單,咱用幾點來說明:

第一,咱攏知韓國「男尊女卑」的傳統觀念,比中東穆斯林回教國家koh khah嚴重;一個無父無母、無翁無婿、無子無兒的孤單查某人,beh佇查某人無社會地位的韓國競選總統是何等困難,而且會tàng拚到當選,是偌呢苦戰!

第二,伊是韓國上出名的獨裁者朴正熙的查某子,朴正熙以政變推翻李承晚政權自稱總統的時,朴槿惠才九歲niā-niā。雖然朴正熙統治下有實現「漢江奇跡」͘韓國經濟起飛的功勞,但是朴槿惠伊tio̍h一直揹「獨裁者的查某子」chit-ê罪名揹半世紀。一直到今年九月,伊公開向韓國人民道歉,為伊老父執政時期所做的錯誤會失禮,承認伊的老父bat破壞民主。

第三,1974年八月十五慶祝南韓獨立紀念日的大會頂面,朴正熙總統演講的時有人開銃拍朴總統拍無tio̍h,第二銃拍tio̍h夫人陸英修重傷死亡。朴正熙堅持無beh koh娶,致使二二歲的朴槿惠tio̍h開始代替「第一夫人」的身分,陪伴老父接待外賓。伊的老母陸英修是一位非常受韓國人尊敬懷念的總統夫人,當時韓國散赤、米糧無夠,伊chhōa全國家庭每工食無仝的雜糧米,拜一紅豆摻白米,拜二番麥摻白米,拜三黍仔摻白米‧‧。

第四,韓國人「轉型正義」做有夠,in徹底ùi歷史詮釋,名譽表彰,͘佇威權時代受tio̍h迫壓的人民感受會到公理得tio̍h伸張,追贈當年受害者作烈士,而且成作教科書內底的英雄。朴槿惠當選總統第二工,照慣例去首爾國立顯忠院向殉國烈士默哀焚香,而且去向故總統李承晚,kah家己的老父朴正熙總統的墓前參拜,上了不起的是伊in老父在生的死對頭故總統金大中的墓前參拜。

第五,朴槿惠m̄-nā佇內政方面,強調和解kah均富,佇外交方面,伊beh\用正確的歷史認知作基礎,願意擴大kah北朝鮮kah日本和解、合作來努力。伊beh改變李明博總統對北朝鮮強硬的作法,伊願意恢復對北朝鮮的援助,但是前提是北朝鮮tio̍h放棄核武計畫。伊的作法是有硬的有軟的。

Chit位看起來足溫柔又koh足堅強的朴槿惠總統,tī 2006年競選連任國會議員活動中,͘人用美工刀劃傷伊的嘴phé十公分長血直直流。事後伊講:「ùi hit時起,我決定奉獻我的生命,來療治恁的傷痕。」伊五十年來所食的苦有夠濟,那像伊講的:「痛苦會tàng證明人猶活得leh!」咱深深祝福伊!

 
< 前一個   下一個 >