首頁 arrow 綠色短評 arrow 逐個來夯反核旗!

逐個來夯反核旗! PDF Print E-mail
Written by 李南衡   
Friday, 04 January 2013
今年的元旦有khah特別。雖然馬英九照例佇總統府頭前升國旗,但是有發生真濟kah往年真無仝款的代誌:伊升伊的國旗,咱抗咱的議!佇北台灣總統府頭前的自由廣場,有一千五百個公民kah學生聚集,ùi十二月三十一暗開始為抗議媒體壟斷守夜;佇南台灣「蘇打綠樂團」演唱王丹的《無菸thang食的日子》呼應反媒體壟斷訴求;佇東台灣,蘭嶼青年選佇核廢料貯存場頭前舉辦跨年活動,祈求為達悟族人kah島嶼驅趕「核廢惡靈」;張震嶽佇東台灣現場支持美麗灣抗爭;陳昇、信、吳志寧、五月天佇北中南台灣各地演唱會中向聽眾傳達反核信念;「反核部隊」佇台北101大樓放跨年煙火的上落尾十秒,象徵反核的輻射人光影,打上101低樓層的外牆,in選擇chit傷害任何人的方式,用「輻射人」符號提出咱的訴求,͘全世界的人攏看tio̍h咱反核的心聲。

 

另外有一陣人用旗仔來反核。旗仔頂面印一粒台灣島,寫「反核」兩大字,細字英文寫“No Nukes”(發音作“nó nuk”意思是無愛核災)、“No more Fukushima”另一排漢字是:mài koh有一個福島(核災)。Chit面「反核」旗仔攏總訂製四千一百六十二面,伊的特點是:無候選號碼,無分色彩,無權力鬥爭;無代表的政黨,無代表的個人,無代表的國家。頂面兩字「反核」是一句口號,是價值、信仰、文明kah愛;頂面的台灣地圖,是國家主權的範圍,是土地、家園、生活kah理想。

  佇主婦聯盟消費合作社全台四十二個共同購買站店頭,攏有掛chit面「反核」的旗仔;金山高中江櫻梅老師kah in厝裡的人夯chit面「反核」的旗仔徛佇核一廠門口看板頭前翕相抗議;台北市螢橋國小六年級資優班全班討論了,決定加入掛chit支「反核」旗仔的行列;兼營民宿的台東「晃晃二手書店」、台北獨立冊店「台灣的店」攏有掛chit面「反核」的旗仔。金門的游斯帆佇古寧頭戰場前夯chit面「反核」旗仔翕相,表達伊對烏坵hông選作低階核廢料最後處置場址的不滿,伊講:金門kah蘭嶼掛「反核」的旗仔,是表達邊境koh變作戰場,邊陲mā bē使變作核廢料的糞圾場!

 

台電按算2013beh追加六百億核四預算佇立法院闖關,beh koh追加人民的血汗錢擲入去核四廠的無底深坑。咱當然反對!「綠色公民聯盟」kah足濟公民團體上接近日本福島核災發生日三一一的週末三月初九,beh佇台北、高雄兩地同時發動萬人遊行,呼籲刪除核四預算,停止危險的核電廠,全面檢討核廢料處理政策。請逐個徛出來做夥上街頭夯「反核」的旗仔,表達咱的憤怒!

 
< Prev   Next >