首頁 arrow 綠色短評 arrow 向望嘉義縣政府的愛心直直湠開!

向望嘉義縣政府的愛心直直湠開! PDF Print E-mail
Written by 李南衡   
Friday, 25 January 2013
食尾牙,原本是台灣一個真溫暖的民俗。咱知,早前農村社會作生理的人想講生理會好攏是土地公致蔭的,咱人(農曆)正月初二tio̍h辦牲禮土地公作生日,以後表示定定會記持感恩,每個月十六koh拜一遍,變作一個月拜兩遍。到農曆十二月十六,算是一年上尾一遍作牙,所以叫作「尾牙」,祭拜特別豐盛,順續用hiah-ê牲禮請員工食一頓chhe-chhau,感謝in一年的拍拚kah勞苦,有時會請親朋好友做夥來鬥歡喜,叫作「食尾牙」。

 

日本殖民統治台灣五十年,帶來了一種類似「食尾牙」的聚會形式叫作「忘年會」,無限定生理人,任何機構組織攏會年底舉辦一遍宴會,同事間佇宴樂中回顧過去的一年互相勉勵beh來的一年做夥拍拚。戰後,影響台灣真濟機關團體每年年底舉辦類似「忘年會」的「食尾牙」,甚至連總統府、行政院、學校、大細間病院,mā tòe人「食尾牙」,會使講是食kah m̄知意思。

 

今年景氣真bái,人民歹過日。嘉義縣政府決定今年無beh「食尾牙」,省落來的經費轉化作愛心關懷行動,農曆過年前的二月初六,由縣政府各局處科長kah員工擔任一日的志工,kā 500份愛心年菜親身送到縣內的弱勢家庭。

 

以往,嘉義縣政府攏有辦歲末聯歡會「食尾牙」,辦桌宴請同仁、摸彩以外,koh有同仁表演節目同樂。今年預定辦一百三十桌的八十五萬,省起來轉作愛心年菜以外,每戶附贈二十台斤的白米。那像張縣長所講的:「嘉義人,家己人。」縣內有弱勢家庭歹過年,咱縣政府員工那好「食尾牙」聯歡咧?

 

張花冠縣長講,咱最近看tio̍h的攏是憂頭結面的新聞,2012年選出來的代表字竟然是「憂」字,顯示台灣人對現在、對未來攏真擔憂。政府應該看tio̍h、體會tio̍h人民的苦情。嘉義縣政府願意為貧苦的縣民做一點仔代誌,張花冠縣長真客氣講che m̄是伊個人主意的,是一個月前,秘書長吳容輝召開會議,逐家決定beh kā辦尾牙的錢省起來,買年菜送͘弱勢家庭,而且由縣府各局處科長帶領同仁擔任一日的志工,親身送愛心年菜去到弱勢家庭。咱向張花冠縣長,縣府各局處科長,以及全體縣府員工說謝、致敬!

 

嘉義縣巴斯奈諾關懷弱勢協會新任理事長羅信富,發起「以愛化礙」行動,捐送白米、食物、連帽的T恤去養老院、kah專收家庭變故學生的民和國中慈輝分校等弱勢團體。慈輝分校的學生mā kā in所學的技能轉化作愛心行動,去安養院為老大人剪頭鬃、作點心請老大人食。張花冠縣長講:Che tio̍h是愛心,咱用行動͘ chit-ê年充滿溫暖,希望逐家愛心直直湠開!

 

※週一8點整、13點整、17點整於電台播出。

Last Updated ( Friday, 25 January 2013 )
 
< Prev   Next >