首頁 arrow 綠色短評 arrow 倩警察來作賊,按呢敢tio̍h?

倩警察來作賊,按呢敢tio̍h? PDF Print E-mail
Written by 李南衡   
Friday, 01 February 2013
人講台灣是寶島,一個寶是台灣的中央有懸山,風颱掃tio̍h懸山煞變細;一個寶是台灣中央的懸山有大樹,大雨一下落,大樹的樹葉樹枝雨水承(sîn)起來,無͘雨水直接落佇土面,雨水慢慢到土面以後,大樹的根挽tio̍h邊仔的土雨水慢慢仔濕入去土裡。雨水才一聲kah水攏總沖入坑溝底。一寶是山頂的大樹真濟是幾百年幾年千的古樹,而且是世界級名貴的樹種,像講扁柏有人叫作薄皮仔(hinoki)、紅檜有人叫作厚殼(menihi)、抑是牛樟,一欉攏價值歸百萬。日本殖民統治剉一大片載去日本,戰後中國國民黨政府佔領台灣成立林務局,竟然仝款是剉貴重的樹欉賣去日本賺錢來維持林務局人員的薪水kah開銷,實在是足無道理,是賣祖先的遺產kah子孫的財產。1989年擔任經建會副主委的蕭萬長建議tio̍h改,七月初一林務局才ùi事業機構kah事業預算改制作公務機構kah公務預算。In的任務ùi剉樹來賣變作保護管理紀錄保育台灣森林。

 

佇林務局下面有一陣巡山員、in是守護台灣森林的無名英雄,in無定期組成「深山特遣隊」,一遍五工至七工,出發前tio̍h準備地形圖、望週鏡。拄tio̍h溪水真掣流(chhoah-lâu)tio̍h箭水過對岸,拄tio̍h斜度75度的岩壁mā-tio̍h peh過去,幾個人干單靠一條粗索、逐個giú-tiâu-tiâu;有時peh一半「嘩!」一聲,山壁崩一角,閃無離就一命嗚呼。山頂有時是寒kah敢,koh無可能食會飽,暗時睏佇山頂尾溜,講有偌冷就有偌冷。一位巡山員講,頂遍來逐個做夥徛佇一欉神木頭前翕相作紀念,無疑誤chit遍來hit欉神木竟然͘山猫鼠剉倒去ah,看tio̍h實在會眼屎流,自責家己那會無幾千歲的神木顧好勢,愈想心愈凝!林務局巡山員會使講是「森林警察」的目睭,in若發現位有人破壞森林,隨時回報森林警察出動去掠人。

一月二九新聞報導,宜蘭檢調破獲山猫鼠集團偷剉貴重的Hinoki kah Benihi,十九名山猫鼠成員中竟然有五名是森林警察!Koh khah驚人的是其中有一名森林警佐是山猫鼠集團的首腦!宜蘭地檢署主任檢察官林宏松講,宜蘭檢方舊年偵辦宜蘭縣大同鄉國有林班hông偷剉的時,tio̍h發現那像有森林警察kah山猫鼠集團勾結,經過佇山區架設新的「微型攝影機遠端即時監控系統」,經過八個外月搜證,才查出有五名森林警察已經變作山猫鼠,而且猶有涉嫌賄賂等不法情事。宜蘭幾名檢察官動員百外名調查員kah警力,佇全台三十三個所在搜索,有搜tio̍h總重量八十公噸、市價上千萬的名貴漂流木以外,猶有獵銃三支、大批無線電對講機、武士刀kah衛星定位器等等。倩警察來作賊,按呢敢tio̍h

※週一8點整、13點整、17點整於電台播出。

 
< Prev   Next >