首頁 arrow 綠色短評 arrow 作頭家的感覺

作頭家的感覺 PDF 列印 E-mail
發表者 李南衡   
2013/02/18, Monday
過年時仔,一般的商店餐廳攏是歇三四工khah濟,像講做麵包做kahtio̍h國際麵包比賽冠軍的吳寶春,伊的麵包店干單歇過年kah新正兩工nā-niā,初二開工,吳寶春͘員工重倍的工資koh包一包六百箍的開工紅包。伊算是相當好的頭家。當然,頭家百百種,食頭路人無地比並,若真正beh比,定定都會「人比人氣死人。」

 

高雄幕府壽司的頭家薛進強算是誠特別的,因為真濟人愛食伊的壽司,新正年頭驚͘人客走來食無失望真歹勢,十年前就新正幾工照常營業。伊kah全體員工參詳,過年暗歇一工,新正幾工攏mài歇睏,初一至初三chit三工,食材的本錢扣起來,恁所賣的攏恁家己去處分,也就是chit三工͘恁每一位攏體驗作頭家的滋味。伊講,過年休假原本就是每一位員工的權利,但是恁會使放棄員工的權利,體驗作三工頭家的責任看bāi。除了厝裡特別有代誌的員工,差不多所有的員工攏甘願放棄年假,拚作頭家作三工。

幕府壽司佇高雄有三間分店,ùi初一到初三,每一間逐工人客都chhiâng-

chhiâng滾,二十九個頭家逐個都無閒kahhai-hai。薛進強一家四個人來店裡用餐,開一千四百外。伊講:我當然mā-tio̍hkā chiah-ê頭家捧場。三工結算,in家己決定按怎分錢:分作店長、年資三年以上、一年至三年、一年以下四等級,每一等級相差五百,三工作頭家的代價是:每一個店長分兩萬二、其他一個分萬四至萬九。員工真誠感謝真正的頭家薛進強,伊每一個員工攏當作厝裡的人,有時雖然物價有起、成本增加,但是應該調薪的時仝款調薪。員工的朋友攏會拜託講,若有欠人tio̍h紹介一下。至少chit三工,in確實有作頭家的感覺。

咱咧?馬英九總統kah伊的執政團隊,聲聲句句講in是人民的公僕。伊執政chit五年來,敢有尊重咱chiah-ê國家的頭家?特別是連任當選了的一年來,會使講是亂挨亂唱,逐個苦勸伊油m̄-thang kah電做夥起價,伊聽,果然百項物資隨時tòe咧起,害咱chiah-ê頭家哀父叫母;煞落去講beh扣證券交易稅,舞kah走出來十幾種版本、舞kah台灣的股票那像熱天的西北雨直直落、舞kah財政部長劉憶如落台煞尾;年尾koh ùi beh刪除於法無據的年終慰問金開始,舞kah piak出各種年金面臨破產危機問題,一直舞kah半暝仔總統府用簡訊講行政院長陳沖落台、新院長副院長啥人,落台的落台,轉去食家己的轉去食家己。全台灣的國家主人͘ chit-ê馬英九舞kah面青損損、足歹過年。講人民是國家的主人,是馬英九講爽的,咱那會一點仔作頭家的感覺都無?簡單講一句就是「惡奴欺主」!

※週一8點整、13點整、17點整於電台播出。

 
< 前一個   下一個 >