首頁 arrow 綠色短評 arrow Beh繼續舞核四廠,講一個理由來聽!

Beh繼續舞核四廠,講一個理由來聽! PDF Print E-mail
Written by 李南衡   
Friday, 22 February 2013
核四廠那像一個無底深坑,已經開二千七百外億,猶振動,已經追加五遍預算,最近講beh koh追加四百億預算。中國國民黨主席馬英九講核四廠一定tio̍h起好,希望黨籍立委會tàng佇立法院贊成追加預算案。In上愛講:「若無核安就無核電」,但是攏無保證講koh追加四百億,核四廠就一定會tàng安全運轉,無保證此後預算bē koh追加。Chit款無底深坑的開錢法、無信用的講話法,m̄-nā全國人民放心,連中國國民黨籍的立法委員會煩惱會驚。

 

早前政府kah台灣電力公司講了上滑溜的白賊話是:「若無起核電廠,台灣一定會欠電。」講了落氣最近才khah少講,但是換一個講法:「有替代能源,台電才會使廢核。」chit-ê雞kui m̄免人撞(tōng) tio̍h家己破,因為逐個攏知,現此時核電廠所生產的電量只不過佔總電量的一成而已,核四廠若起好運轉,干單佔總電量的五葩nā-niā,現此時台電有chhun電量二十二葩至三十葩。

舊年總統大選的時,民進黨候選人蔡英文提出是核四mài運轉、2025年達成「非核家園」的目標,為tio̍h達成tī chit-ê目標,tio̍h拚勢開發綠色能源;中國國民黨的候選人馬英九mā kah人喝「非核家園」,但是伊thiau故意無愛講一個預定達成目標的年限,變作一個標準的口號。所以當選了,完全無beh開發綠色能源,若照伊按呢,綠色能源永遠mā kah現此時仝款只有二葩nā-niā。可惡!

早前台灣電力公司上愛臭彈的一句話是:「核能發電上省錢。」別項mài講,干單講核四廠猶振動所開的錢,猶無算運轉了後將來處理核廢料所需要的費用,就比任何款式的發電廠都khah傷本。

 

早前台灣電力公司家己認為核能發電上偉大的一項功能是:「安全」。真失禮!自從2011年三月十一,日本福島發生核災了後,全世界攏驚tio̍h,連科技hiah呢進步的日本都無法伊,何況其他的國家?真不幸,咱台灣三個核能發電廠的位置拄拄佇首都圈kah活斷層邊仔,萬一若發生核災,走都無路,是關係tio̍h八九百萬人的生命財產的安全。你講台灣電力公司抑是馬政府有啥物應變方案?無。完全無任何應變的辦法,猶koh敢講啥物「無安全就無核電」?

早前,͘台灣電力公司騙過來騙過去,真濟人戇戇支持台灣電力公司的核能政策,今仔日,愈來愈濟人知影核災的嚴重性。台灣永續能源研究基金會,最近所做的「佇核能安全規範下面,是是支持興建核能發電廠」民意調查,結果是45.1%的受訪者支持,比舊年降低5.7%,無愛支持的升到52.4%,愈來愈濟。

馬政府堅持beh舞核四廠,拜託講一個正當的理由來聽。免濟,一個tio̍h好!

※週一8點整、13點整、17點整於電台播出。

 
< Prev   Next >