首頁 arrow 綠色短評 arrow 終結核四計劃!拒絕危險核電!

終結核四計劃!拒絕危險核電! PDF 列印 E-mail
發表者 李南衡   
2013/03/15, Friday
311日本福島核災兩周年的前兩工309,台灣兵分四路,同時佇北、中、南、東舉行反核遊行。民進黨主席呼籲黨員擁踴參加,但是絕對使夯黨的旗仔抑是個人的旗仔,也就是佇完全無政黨動員的情況之下,台北有十二萬人、台中有三萬人、南台灣高雄有七萬人、台東有三千外人參加,寫落台灣社會運動史新的一頁。

 

因為兩年前發生佇日本福島的核災實在會hông驚,何況咱台灣起二十外年猶起好的核四廠是一台拚裝車、是原裝車,而且追加預算四遍,今年tio̍h thūn四百億,猶tio̍h koh thūn偌濟億才起會好;到今仔日連原子能委員會主任委員蔡春鴻都講核四廠是一個「先天不良,後天也有點失調」的工程計劃,核四廠「現階段」猶未達到安全的程度,原子能委員會無法度對目前的核四廠的安全背書!而且核四廠佇燃料棒裝填進前,台灣電力公司應該完成送審事項有七十五項,到今仔日為止通過安全審查的干單二十九項niā-niā,連四成都無。馬政府江行政院長那有面敢講beh「核四公投」?完全無顧tio̍h台灣人生命財產的安全,莫怪全台灣的人會phī-phī-chhoah,驚到緊出來遊行反核四!

Chit遍出來反核四的人是全面的ê,作媽媽的人驚in的後一代生活佇核災的陰影內底,勇敢chhōa囝仔大細徛出來遊行反核四;真濟青春少年家無愛in-ê彩色人生變黑暗、ê溢出來街路遊行反核四;真濟藝文界的朋友無分黨派意識型態行出來遊行反核四;與世無爭的原住民bē-tiâu,因為水已經淹到嘴ah!核廢料囥佇蘭嶼已經超過年限猶無beh徙走!佇台北真濟人行出來圍總統府,in無親像約書亞所chhōa的以色列人圍耶利哥城圍七工、第七工se̍h耶利哥城se̍h七輪了後,作夥大聲喝一聲,耶利哥城就倒去。In圍總統府無作夥喝聲,總統府無倒去,但是若違背民意硬beh繼續起核四廠,馬政府可能會倒!

咱看日本福島311核災兩年ah,清理核災地區受污染的土、樹葉、建物的磚瓦等糞埽猶清未完,清理好的糞埽用厚的烏塑膠袋仔一包一包包密密,堆佇現場,mā m̄the̍h去叼位才好。想起咱核一核二核三廠的高輻射核廢料kah低輻射核廢料,到底beh the̍h去叼位?台灣電力公司抑是馬政府敢有答案?無,完全無。按呢你敢煩惱?無終結核四廠,無拒絕核能發電,敢會安心?

台灣人真清楚馬政府表明:終結核四計劃!拒絕危險核電!無安全的核四廠阮會驚!核災阮會驚!台灣人敢無「免驚惶的自由」?按呢,馬政府猶koh beh「核四公投」,in想講「公投」in tio̍h穩嬴。無管民意,好膽試看覓!

※週一8點整、13點整、17點整於電台播出。

 
< 前一個   下一個 >