有一部分上海人飲的自來水是取用黃浦江的水，上海人當然會煩惱，每工飲chit款浸過萬外隻死豬仔囝的水，敢無問題？中國有一位天才農業專家講， che那像一個游泳池跋死一隻胡蠅，感覺上當然khí-mo bē爽，但是對水質bē有偌大的影響，何況黃浦江hiah大條，而且江水是活流的，那有啥問題？上海市水務局副局長沈依雲講，chit款自來水我都敢飲，那有啥問題？佇網路頂面hông罵kah臭頭應該是意料中的代誌。上海人當然會煩惱政府按怎處理hiah濟死豬仔囝，一方面有挖六個幾米闊的深坑，先kā死豬仔囝hiat落去，噴消毒藥水了後，才koh佇死豬仔囝頂面蓋生石灰才埋密。另一方面，好佳哉上海有全國唯一的「動物無害化處理中心」，用焚燒方式安全處理動物屍體的企業，hia有一台攝氏一千一百度高溫焚燒爐kah一套高壓蒸煮滅菌設備。上海人雖然看tio̍h萬外隻的死豬仔囝浮佇黃浦江裡真煩惱，總是mā感覺真萬幸，若是幾年前，chiah-ê死豬仔囝真有可能變作ian-腸仰是肉干佇市面上販賣，早早hông食了了去ah！按呢想起來，chit-ê國家那像mā有teh進步。

講是按呢講，上海人mā真想bē曉，是按怎代誌發生到chit陣半個外月ah，猶無法度查出來死豬仔囝是ùi叼位來的？仝款想bē曉的猶有陝西省咸陽市附近渭河區域中段，tī三月十五mā hô͘二十外隻死豬仔囝，屍體已經腐爛臭mo͘-mo͘；廣東省鶴山市昆南河小江村段會使講是逐工都有大量的死豬仔囝浮佇水面，干單懷疑是ùi上游流落來的niā-niā；湖北省宜昌五龍河到taⁿ猶teh hô͘死豬仔囝，真夭壽攏分裝佇麻袋仔，臭死人。當今khah大齣的至少to̍h有四五位，攏總無法度查出來死豬仔囝是ùi叼位來的，實在是足奇怪。

一九七０年代原住民歌手萬沙浪唱一首「風ùi叼位來」，佇台灣非常流行，有一站ho͘中國國民黨政府查禁。假使最近中國人若唱一首「豬ùi叼位來」的歌，若流行起來，m̄知會ho͘中國共產黨政府查禁抑bē？

※週一8點整、13點整、17點整於電台播出。