首頁 arrow 綠色短評 arrow 中國富豪團對台灣e5可怕衝激

中國富豪團對台灣e5可怕衝激 PDF 列印 E-mail
2008/04/30, Wednesday
「陸港房地產企業家台灣考察團」結束in ti7台灣四工三暝e5行程,四月二四下晡坐飛機離開台灣,短短三、四工人,對台灣造成e5衝激非常驚人。因為Chit個訪問團九個團員是有超過新台幣五千億身價e5好額人,所以台灣e5新聞媒體攏稱呼in是「中國富豪團」。 咱知影,ti7中國欲親像這九個chiah好額,身份背景絕對m7是普通普通。咱看in chit團召集人劉長樂,伊目前是香港鳳凰衛視行政總裁,中國人民解放軍出身,現此時ma7是中國政協委員。咱會tang3想像其他八個成員,ma7攏m7是小可人。   Chit遍in來台灣會造成chiah呢「轟動」,主要有兩個原因:第一,中國國民黨主政e5縣市長高規格接待,ui3台北市長、台北縣長、桃園縣長到台中市長,那像teh迎接ui3天頂下凡e5財神爺,ka7準作各縣市經濟復興e5萬靈丹。第二,台灣e5電視及報紙記者,那像m7識香臭e5 胡蠅鼻tioh8啥物,攏總khiN5倚去走be7開腳,ti7報紙頂面大篇大篇介紹、ti7電視頂頭一遍一遍報導。所以Hou7 chit個考察團留tioh8深刻印象是「台灣媒體e5熱忱」。   真濟人teh煩惱chit 個團是欲來台灣炒房地產,親像一九九七年香港回歸中國以後,中國人去香港炒房地產,hou7香港e5房地產起六成,炒到香港人哀父叫母。房地產炒了、錢趁了、人soan了,香港e5房地產跋七成。台中市長胡志強替in辯護講:若欲炒樓其實m7免chiah呢chhia-iaN7,面對in咱m7免有吸金e5 心態,大陸地產投資商ma7 m7 tang有炒作e5心理。胡市長實在是做官e5 料,講chit種無人知影伊teh講啥物碗糕e5話。Ma7有親像台北市府研考會主委盛治仁chit 號戇mah-mah e5人講:「全球各國攏ma7 be7抵抗拒絕外來投資e5資金流入,無管是買樓抑是投資開發案,其實攏有帶動經濟產業發展e5正面意義。」敢有影全世界各國政府攏親像盛治仁chiah狂?攏無管制?騙siau2 e5!   台灣有媒體講in chit團是炒樓團,chit 團e5成員聽了真無歡喜,講in e5焦點是旅遊相關項目,m7是炒樓。到底是按怎?咱來看中國《上海證券報》e5報導按怎講:「中國地產商頭一遍ti7政府相關部門組織下面去台灣考察,是為tioh8兩岸地產市場互通尋機會。」鴨卵密密ma7有縫。Chit個團按怎講ma7無法度掩蓋事實及背後e5動機。 有人問講,Chit個團來台灣訪問,hou7台灣上大e5衝激是啥?我認為,咱猶未看tioh8中資來台hou7台灣經濟崩盤進前,就已經看tioh8台灣媒體、中國國民黨e5縣市長及in e5官員心理上先崩盤,這才是真正可怕e5所在。
 
< 前一個   下一個 >