首頁 arrow 綠色短評 arrow 具有中國特色的道理!

具有中國特色的道理! PDF Print E-mail
Written by 李南衡   
Friday, 29 March 2013
中國kah東南亞的越南、馬來西亞、菲律賓三國佇南海攏有爭端,che三國講一寡島嶼、沙洲kah海域,佇阮兜門口當然是阮ê,阮漁民佇hia掠魚tio̍h koh͘中國武裝的船趕,實在是豈有此理!路尾in mā派武裝的船去趕中國漁船。中國講hiah-ê島嶼kah海域自古就是中國神聖不可分割的領土kah領海,當然tio̍h保衛。中國希望kah一國一國對談,隨個拍死;東南亞chit三國希望三國做夥kah中國談,那會使的,上好是用「東盟」十國的名kah中國談,khah bē hō͘中國食去。雙方khahmā bē對同,致使南海爭端一直攏無解。

 

以黃岩島作例來講,黃岩島是中沙群島中唯一露出水面的島礁,佇菲律賓呂宋島西部外海約兩百公里的所在,中、菲兩國攏主張黃岩島是in-ê,舊年(2012)四月,菲律賓軍艦beh掠佇黃岩島附近掠魚的中國漁民,卻遭受tio̍h兩隻中國海監船的阻擋,講是菲律賓軍人侵入中國領土。四月十一,菲律賓政府召見中國駐菲律大使抗議,北京向馬尼拉提出嚴正交涉,雙方攏重申in有黃岩島的主權,但是攏同意透過外交途徑來解決爭端,意思是講爭端會一直拖落去。

今年一月初,菲律賓外交部長羅薩里奧(Rosario)講,已經要求中國解釋,為啥物佇有爭議的南海水域部署巡邏艦?而且指責中國是再度引起緊張。一月二二,菲律賓外交部長召見中國駐菲律賓大使馬克卿,講菲律賓會將黃岩島的主權爭議向聯合國機關提出仲裁要求。中國駐菲律賓大使馬克卿發表一份聲明,重申中國的原則立場,而且強調中國對南海的島嶼kah周圍水域有不可爭辯的主權。

菲律賓kah中國佇南海的爭端,菲律賓提出國際仲裁,向聯合國提交的文件中講,中國的「九段線」邊界一寡鄰邦的水域攏涵蓋佇內底,是非法行為。中國指責菲律賓非法侵佔中國部分島礁,但是希望菲律賓mài採取任何͘問題複雜化、擴大化的行動。三月二六,中國外交部表示無同意由國際海洋法法庭裁決南海諸島的主權爭議。原本,the̍h起叼位攏講會通的才叫作「道理」,但是中國一直認為in講按怎tio̍h應該按怎,che tio̍h是「具有中國特色的道理」。

因為中國無同意國際仲裁,國際海洋法庭現任庭長柳川俊二任命波蘭籍法官帕夫拉克代表中國出席法庭。根據《聯合國海洋法公約》,國際仲裁法庭組成的五人仲裁團聽雙方的論據了後,一旦根據國際法看叼一旁的主張khah有理作出判斷,續落來就是強制程序,無管爭端的叼一旁有參與抑無、無管爭端的叼一旁有同意抑無,仲裁法庭所作的仲裁結果,對雙方攏有約束力。

 

具有中國特色的道理,chit遍有可能會踢tio̍h鐵枋。

 

 

※週一8點整、13點整、17點整於電台播出。

 
< Prev   Next >