首頁 arrow 綠色短評 arrow 馬英九目睭金金人傷重!

馬英九目睭金金人傷重! PDF Print E-mail
Written by 李南衡   
Tuesday, 09 April 2013
逐個應該猶會記得,2008年馬英九競選總統的影片,有全台灣中國國民黨執政的縣市長做夥出來贊聲:「阮已經準備好ah!」頂日南投地檢署查南投縣長貪污案,查出李朝卿ùi 2005年十二月就任縣長兩年外攏無貪污的現象,2008年三月,馬英九當選總統、李朝卿等得到五月二十馬就任總統tio̍h開始大細項貪、無所不至污。經過chit五年咱才知影「阮已經準備好ah」的意思是in準備好ah beh貪污!不但縣市長beh貪、各級民意代表beh污、民意代表落選轉去作行政官員的beh貪,連縣市長的小弟、舅仔攏beh鬥陣污。致使有網友keng-thé馬英九的清廉代表是:北有賴素如、南有林益世、中有李朝卿,西有卓伯仲(彰化縣長卓伯源的小弟)。涉貪hông收押的台北市議員賴素如,會͘中國國民黨主席馬英九哭哀「創巨痛深」,並是因為賴素如身兼中國國民黨中常委、文傳會副主委,真正鑿tio̍h馬英九心肝頭仔的是,身兼中國國民黨主席辦公主任的賴素如,竟然好大膽叫hit當時台北市捷運局長陳椿亮去中國國民黨中央黨部向伊報告太極雙星案,明明世間人講:中國國民黨中央黨部就是chhiâu代誌的貪污中心!按呢,身為中國國民黨主席的馬英九,猶koh有啥物面講伊競選連任黨主席的心意無變,面皮實在是有夠厚,厚到銃子拍過的程度ah

 

311日本福島核災兩周年的前兩工三月初九,台灣北、中、南、東同步舉行反核大遊行,超過二十萬人行出來大聲反核電。有一陣媽媽為tio̍h囝仔的將來徛出來反核電,感動真濟人;台北市長郝龍斌講:若照我目前手裡的資料kah數據,明仔載若公投,我選擇無支持核四續建;新北市長朱立倫原本講:無安全就無核能。馬英九總統驚一下緊請in兩個kah基隆市長去搔頭殼,搔了後,郝市長講伊的看法無改變,有人講朱市長hông搔一下頭,態度變作保留。按呢講朱市長無公平,因為朱市長早早tio̍h kā馬總統「軍」死棋去ah!伊講:「無處理核廢料,無資格用核能。」按呢,那有啥物核四、那有啥物公投、那有啥物核電咧!

Chit碼已經是繼續起核四廠tio̍h公投抑免的問題,今仔日逐個主張的是既然無安全的保證,核四廠tio̍h應該馬上停建!照三月二八台北市政府所作的民調,假使明仔載公投,有71%受訪者講會出來投票,有66%受訪者同意停止興建核四,無同意的才18% niā-niā。按呢tio̍h知影民心所向。

到今仔日,馬英九猶頭昏昏腦鈍鈍。伊若堅持beh競選連任中國國民黨黨主席,有可能會亡黨;伊若堅持beh繼續起核四廠,有可能會亡國。馬現此時是放尿疼、放屎疼。你看伊目睭金金,事實上是人傷重。嗚呼哀哉!

 

 

※週一8點整、13點整、17點整於電台播出。

 
< Prev   Next >