首頁 arrow 綠色短評 arrow  核廢?廢核!

 核廢?廢核! PDF 列印 E-mail
發表者 李南衡   
2013/04/26, Friday
四月二二世界地球日,馬英九總統照慣例接見環保團體人士。鹽寮反核自救會會長吳文梓馬總統致詞了後,當面遞交陳情書,伊講希望核四廠會tàng停建,無必要舉辦核四公投浪費公帑。伊講,核四才佔台灣發電量6nī-niā,台電的備用電力超過20葩、準若隨時停建核四廠,台灣mā bē缺電,並要求總統會tàng kah當地民眾做夥去參訪核四廠,雙方面對面構通,馬總統當場答應。

 

台灣生態學會秘書長蔡智豪表示,全世界無一個國家保證核電百分之百安全,伊要求免公投tio̍h廢核;公民監督國會聯盟執行長張宏林希望核四案tio̍h尊重立委表達意見的自由,͘立委獨立行使職權;主婦聯盟董事長陳曼麗會後表示,環保團體的訴求包括核四停建、無應該交付公投,若beh公投mā tio̍h降低公投法戶碇,制定非核家園推動法、半年內召開全國能源會議。馬總統承諾相關部會研究了後,一禮拜內回覆。佇核四公投部分,馬總統強調尊重立法院kah行政院處理結果;關於核四廠停建,伊以2000年(阿扁政府時代)行政院宣布停建核四了後,大法官釋憲結果作例,表達伊對停建核四保留立場。

事實上,伊對核四停建的看法,前兩工四月二十接受《中國時報》專訪的時tio̍hkah真清楚:「透過公投決定核四是beh停建,是民主社會的爭端解決機制」。伊koh講:「廢核是一種價值選擇,干單會tàng透過公投解決。」設使核四公投最後成案,代表佇法律上「核四無必要停建」。按呢,今年三月行政院長江宜樺講:「若無核安,就無公投。」是啥意思?

事實上,咱͘馬政府chit-ê魔神仔拖teh la̍k-la̍k sēsē bē出來。咱應該問伊上簡單的一句話:核廢料你beh按怎處理?若無法度處理根本tio̍h愛廢掉所有的核能發電廠。若有法度圓滿處理核廢料,才來談核四廠起了有安全無?若無安全,根本tio̍h隨時停建,無安全,beh公投創啥?那會使kohhia thūn錢?

四十年前政府tio̍h講四十年後會chhōe tio̍h核廢料最終的處置場,四十年已經有十位原能會主委接過手,有十位台電董事長換過人,責任攏推͘後任的人,致使到今仔日核廢料最終的處置場猶知佇叼位,beh按怎處理。目前總共已經有產生約一萬五千七百十五束用過的燃料棒,分裂三萬一千四百三十公斤鈾235,相當三萬外粒原子彈所產生的輻射核種。Che m̄是咱看電視報導囥佇蘭嶼的低階核廢料所會比得的。看你會驚莫?

此後反核人士干單問馬政府一句話tio̍h好:核廢料beh按怎處理?若應出來,啥物核電攏免講!核廢都beh按怎處理,當然tio̍h廢核!

※週一8點整、13點整、17點整於電台播出。

 
< 前一個   下一個 >