首頁 arrow 綠色短評 arrow 香港為啥物抵制賑災四川?

香港為啥物抵制賑災四川? PDF 列印 E-mail
發表者 李南衡   
2013/05/03, Friday
四月二十早起八點兩分,中國四川省雅安市蘆山縣發生七級地動,攏總有十九個市州一百十五個縣受影響、造成一百九十九萬災民、一百九十三人死亡、二十五人失蹤、一萬兩千二百十一人受傷、重傷的有九百六十八人、緊急轉移有四十五萬八千人。厝倒去的有兩萬四千外戶、七萬外間,嚴重損害的厝有二十九萬五千外間、一般損害的有十一萬七千外間。

 

全世界無論叼位有天災地變人禍,有人死亡受傷、有人流離失所,咱聽tio̍h

攏會真艱苦心。總是發生的所在離咱遠近、kah咱的關係親疏,咱關心kah beh伸手援助的熱誠tio̍h會無仝。照理講,香港離四川無遠,平平攏是中國管轄的所在、koh攏是中國人,四川雅安chit遍發生大地動,香港應該誠拚勢捐款援助才tio̍h,那會聽講香港人無愛賑災捐款咧?而且驚動中國共產黨機關報《人民日報》海外版寫社論指責講:少數香港人抵制賑災捐款,in的理由敢徛會tiâu?文章講,四月二四,香港特區立法會財務委員會,就特首梁振英提議撥一億港幣作賑災基金捐助四川省政府特別會議,經過兩點鐘辯論,因為議員對捐助意見差真大致使流產。文章講,有人講連一角銀mā bē出得,因為「無法度保證捐款全部會到災民手中」,有人建議一億港幣全部交͘非政府組織、抑是買物資直接寄去災區。有人講「內地有錢,無需要香港人捐錢。」2011年日本大地動in捐真濟錢͘日本,那會無講日本有錢?chiah-ê攏是徛bē tiâu的借口,本質上是賑災政治化;《大公報》甚至罵講香港抵制賑災捐款是:反中央,反民族。

講起來中國共產黨機關報《人民日報》寫chit種社論,會使講是「見笑代」。

若是照伊講的是「少數香港人」,那有可能佇立法會財務委員會辯論兩點鐘,連一億港幣都通過咧? 2008年五月十二,四川汶川大地動,香港捐一百億港幣作災後重建,拄拄一億的一百倍neh!是按怎頂遍熱phut-phut、五年後的今仔日會冷ki-ki咧?hit當時,香港有出資二百萬港幣興建綿陽紫荊中學,後來校地改建作豪華商場,二百萬港幣走去叼位完全無交代;莫怪香港人會擔心善款用途無透明,無法度確保災民會得tio̍h援助。是按怎明知日本有錢,2011年日本大地動香港人koh捐真濟錢͘日本?因為in相信日本官員歪哥。

中國人上見笑的就是反對伊的人攏講是「少數」,咱攏猶會記得早前佇台灣,中國國民黨罵反對伊的人是「一小撮仔」異議分子。「一小撮仔」人煞伊的政權ián倒!koh一項,人明明是驚你歪哥無愛捐錢賑災,煞夯啥物「反中央」、「反民族」的大頂帽仔來hap死人!奇怪,香港人那像無驚。

※週一8點整、13點整、17點整於電台播出。

 
< 前一個   下一個 >