首頁 arrow 綠色短評 arrow Ka7恁父恬去!

Ka7恁父恬去! PDF Print E-mail
Tuesday, 06 May 2008
真濟教授上電視時事評論節目,無管是偏藍e5抑是偏綠e5,因為in有某一方面e5學術素養,雖然有e5言論無tu2-tu2順tioh8你e5心、抑是合tioh8我e5意,總是比一般邀請來e5來賓講話khah有理氣,ma7 khah be7過頭歪chhuah。身為一個學者,伊當然有時會用tioh8伊所研究過e5專業學術理論,加減hou7電視聽眾增加一寡智識,這ma7算是一種真好e5社會教育。 大學教授ti7咱台灣社會,相當受tioh8尊敬。不過講起教授ma7是百百種,有好e5 ma7有bai2 e5。一位大學教授好bai2,教育部及每一間大學攏有in e5評鑑機制。以前是kan-taN老師評鑑學生,現在學生ma7有teh評鑑老師,大學教授除了有照時間認真教冊,咱講e5「傳道、受業、解惑」以外,猶koh tioh看伊ti7專業學術頂面所做e5研究成績,看伊ti7國內外學術期刊發表偌濟篇論文、看伊有啥物著作、看伊一年參加幾遍學術會議、有幾遍學術講演等等。   一位教授ti7課外e5言行若是無違法,伊帽仔欲按怎戴歪歪、嘴鬚欲撇to2一旁、一頓食飯食幾碗、ti7報紙雜誌寫過啥款文章,ti7電台電視講過啥物言論,攏是伊個人e5代誌,ma7是伊e5自由,啥人都無權thang管伊。m7但是按呢,一個真正民主自由e5政府tioh8保護包括大學教授在內e5每一位國民,確保每一個人e5自由無受tioh威脅、干擾及迫害。   聽講四月三十,準行政院長劉兆玄欲ti7東吳大學召開伊校長任內最後一遍e5校務會議,討論是m7是應該對教授上電視時事評論節目建立規範。劉校長無想tioh8所有e5輿論攏喝m7-thang按呢!好佳哉,東吳大學校務會議中無做結論,決定交hou7教評會去研究。 劉兆玄校長講這及言論自由無關係,會想欲按呢管制,第一、是比照大學教授兼課be7使超過四節課,每一位教授每個月上電視節目ma7 be7使超過四遍。第二,加減及董事會募款有關係。恐怖!大學董事會有權干涉教授言行!確實會hou7人感覺tioh8白色恐怖e5烏雲koh罩倚來!是m7是劉校長借董事會e5名,欲離開東吳大學進前先定一個規矩,等伊五月二十正式就任行政院長,就會使叫全國大專院校有樣看樣?這會hou7人聯想,敢講中國國民黨koh提tioh8政權了後,蔣介石e5陰魂不散,「馬上」koh倒轉來?實在是hou7台灣人真驚! 一般來講,ti7專制獨裁e5社會,有人靠勢伊有絕對e5威權,m7 koh驚伊e5權威受挑戰,家己khah無理、驚講輸人,伊teh講一個道理抑是做一項代誌e5時,往往會採取上蓋au3 e5一步,就是大聲喝一聲:ka7恁父恬去!
 
< Prev   Next >