首頁 arrow 綠色短評 arrow 民主chit條路真坎坷!

民主chit條路真坎坷! PDF Print E-mail
Written by 李南衡   
Friday, 10 May 2013
「五月五換政府」馬來西亞全國大選,在野的「人民聯盟」期待政黨輪替無達成。馬來西亞獨立到今五十六年一直執政的「國民陣線」慘嬴,雖然「國陣」有掌握tio̍h國會兩百二十二席超過半數的一百三十三席,嬴「民聯」的八十九席,但是「國陣」得票數五百二十三萬外票、得票率四十六點六葩,「民聯」得票數五百六十二萬外票、得票率五十點一葩、嬴三十九萬外票。有史以來「國陣」頭一遍得票率無過半。馬來西亞學英國實施內閣制,由國會議員超過半數的政黨抑是政團組閣,總理kah部長由執政黨議員擔任。

 

人口兩千八百萬的馬來西亞,馬來族佔一半、華人二十三點七葩、原住民十一葩、印度族七葩。馬來西亞族群意識真強,無論在朝在野攏tio̍h以包容馬來族(in叫作巫裔)、華族kah印度族的多元性作訴求。「國陣」以「巫人統一機構」(簡稱「巫統」)作主體,配合「馬來西亞華人公會」(簡稱「馬華公會」)、kah「泛馬來西亞印度人國民大會」(簡稱「國大黨」)等組織,主要強調馬來族民族主義、是保守的右派;「民聯」主要包括以馬來人為主的「人民公正黨」(簡稱「公正黨」)、以華人為主的「民主行動黨」(簡稱「行動黨」)kah「馬來西亞伊斯蘭黨」(簡稱「伊斯蘭黨」),主要訴求是進步、民主、平等的福利國家,算是左派。

五十六年來佇一黨獨大的情況下,執政的「國陣」獨裁kah貪污腐敗,͘真濟馬來西亞人感覺真見笑、希望變天;各種政策公然偏袒馬來人;大選前,執政黨公開提大約二十六億美金補助貧戶;選前大馬獨立媒體遭受tio̍h有組織的攻擊;有人佇馬來西亞tòa十七年猶無選舉權,相對的,大選當日有警察chhōa一陣一陣的外勞去投票(標準的幽靈選民);開票中忽然間會失電,koh光的時加幾若腳票櫃,「國陣」的候選人反輸變嬴;有人猶未去投票已經hông冒名去投票了ah;開票開五點鐘開出來,拖到暗時十點外才陸續公布選舉結果。

Chit遍馬來西亞的大選,「民聯」的領導者安華kah伊的查某子雖然攏順利連任當選國會議員,但是失敗佇伊無擴大馬來族的選票;chit遍大嬴的是「民聯」下底的華人組織「行動黨」,致使執政的「國陣」總理喝講是「華人海漲」,佇「國陣」下面的「馬華公會」大輸,總會長蔡細歷講,此後是「馬來人在朝、華人在野」,koh講「馬華公會」beh退出「國陣」,無beh參加執政聯盟。

 

͘咱驚一tiô的是,馬來西亞執政黨「國陣」選舉的àu步那會kah台灣的中國國民黨hiahsêng咧!m̄知中國國民黨有去kâng收技術指導費抑無?mā hō͘咱看tio̍h搖頭,感慨:民主chit條路真坎坷!

※週一8點整、13點整、17點整於電台播出。

 
< Prev   Next >