首頁 arrow 綠色短評 arrow 烏白亂舞的禁刣活禽政策!

烏白亂舞的禁刣活禽政策! PDF Print E-mail
Written by 李南衡   
Friday, 17 May 2013
tio̍h因應H7N9疫情,農委會五月初八下晡宣布,原本預定六月十七開始實施傳統市場禁刣活禽政策,提早ùi五月十七開始執行。一個完全無配套、無緩衝時間的政策,顛倒提早來實施。農委會動植物防疫檢疫局表示,ùi五月十七開始,傳統市場內絕對禁止刣活禽,違反者會tàng用三條法罰伊:用畜牧法罰新台幣兩萬以上、十萬以下的罰鍰,再犯thang處一年以下有期徒刑,抑是併科新台幣十萬罰鍰;攤販若排出展示活禽販賣,會tàng用傳染病防治法罰三千以上十五萬以下的罰鍰,會tàng連續罰;現刣活禽污染環境,會tàng用廢棄物清理法罰千二箍以上、六千箍以下罰鍰,會tàng連續罰。看你會驚莫?按呢,全台灣原本傳統市場刣活雞的攤販beh賣的雞,當然tio̍h ùi電動屠宰場供應。

 

問題是新北市、基隆市、新竹市kah嘉義市,無kah一間合法電宰場。behchit幾縣市原本賣雞的攤販去叼位chhōe電動屠宰場咧?農委會防疫局講kah足輕鬆:chiah-ê縣市的攤販會tàngchhōe鄰近的縣市電宰場。新北市偌闊伊敢知?新北市各區kah基隆市「就近」來台北市環南市場電宰廠,偌遠伊敢知?一個縣市一間電宰廠咱猶嫌無夠,何況是無!政府是白癡無是啥?

 

農委會開咱老百姓的錢疼,原本刣活禽的攤販若切結無beh koh刣活雞的會tàngtio̍h十萬箍的冷藏設備補助,改向業者批購電宰雞的每隻會tàng補助十五箍。按呢那像是真完善的辦法,但是想看māi,佇傳統市場內底刣好的雞匟佇冰廚內底是beh按怎賣?比一般的超級市場抑是量販店嬴人叼一點,人為啥物tio̍h一定來你chia買?有啥競爭力?

禁刣活禽政策會台灣土雞仔逼去絕種的路。台灣土雞品系有真懸的多樣性,雞農會tàng家己決定小雞的種類、飼料、藥品,所以各品系有無仝款的抗病性、換肉率、特別的肉質、無仝的氣味、kah大細無仝的體型。電宰設備無法度應付無仝體型的土雞,時間一下久,各種特色的土雞無法度佇商業化量產之下會慢慢受淘汰最後就是斷種。將來佇高密度飼養、長期使用抗生素的工業化養殖,kah病毒突變無法度脫離關係。最後,大財團增加對雞農的剥削,白肉雞的單一化剥奪消費者的選擇權利,當然傷害tio̍h生物多樣性。台北市政府強調電宰雞肉是「衛生」的,事實上是背離一直追求健康安全的消費者kah農民。

政府講為tio̍h防止H7N9禽流感流行,台灣的雞並無禽流感,是按怎behpiāng-piāng實施傳統市場禁止刣活雞咧?卻允准中國H7N9禽流感疫區的人來台灣lōa-lōa-sô觀光。Chit款的政府你無罵伊白癡,人會想講你是白癡!

※週一8點整、13點整、17點整於電台播出。

 
< Prev   Next >