首頁 arrow 綠色短評 arrow 歹運tu2 tioh8外交金光黨

歹運tu2 tioh8外交金光黨 PDF 列印 E-mail
2008/05/13, Tuesday
蔣介石堅持「漢賊不兩立」e5原則,無愛及中華人民共和國做夥ti7聯合國;堅持「一個中國」立場,無愛任何國家雙重承認中華民國及中華人民共和國。致使hou7中華民國掛名上市e5台灣,ti7國際社會路愈行愈eh8,及中華民國有邦交e5國家ma7一日一日少,chhun二十三國nia7-nia7。 可憐e5阿扁政府上台了後,phainn7 chit個外交重擔phainn7到phinn7-phenn7喘,一日到暗驚to2一個國koh hou7中國搶去。只好照中國國民黨政府時代e5辦法,盡量用錢去買一個一個國家e5外交承認,名義上講是貸款、贈款、投資等等方式,去援助當地政府e5重大建設,有偌濟錢hou7彼國e5政府官員食去,ma7無人知,那像中日戰爭期間,一寡美援走入去孔宋蔣三家e5袋仔內。   Chit遍為tioh欲爭取及Papua New Guinea建交,煞了美金二千九百八十萬約新台幣十億。看tioh8中國國民黨立法委員ti7 hia罵大罵細,感覺真悲哀ma7真好笑!台灣會行到今仔日chit個地步,敢m7是恁中國國民黨做得來e5?有啥物thang罵咧?遠e5 mai3講,一九九九年中國國民黨政府及馬其頓建交兩年外,開二億二千萬美金,koh加一個八千萬美金協助馬其頓政府平衡薪資、技術支援及社會福利。一九九九年Papua New- Guinea講欲及咱建交,咱承諾每年hou7 in五千萬美金,連續五年總共二億五千萬美金,koh提供十年e5二億五千萬美金貸款,猶koh一個khah心適e5是九百六十萬美金e5政黨活動費,結果建交三工。當時咱ma7是皮皮仔罵nia7-nia7,因為咱知影台灣外交處境真困難。   咱那會歹運tu2 tioh8外交金光黨咧?因為金錢外交一定tioh8守秘密,若無,中國隨時倚來、一個就搶去。致使咱有時會tu2 tioh8彼國e5外交部長、總理、總統抑是生理人來牽猴仔,建交無成,錢煞hou7人sop去。hou7啥物人sop偌濟錢?無人會講,咱政府ma7攏 m7敢哀一聲。   馬政府連鞭欲上台,馬英九當然ma7知影chia e5問題,所以伊除了講「不統不獨不武」以外,緊koh講一句:「外交休兵」,意思是勸中國mai3 koh按呢搶來搶去加開錢,留一條活路hou7台灣行。中國隨時開記者會應講:「中國kan-tann一個nia7-nia7。」講到chiah清楚ah,馬英九敢聽無?   Chit遍阿扁政府tu2 tioh8外交金光黨,司法調查了後,若是證明行政院副院長邱義仁、外交部長黃志芳等政府官員攏無提錢、無貪瀆e5問題,行政疏失及政治責任當然有,ma7無必要hiah呢嚴責in,特別是中國國民黨e5立法委員,恁以前所做過e5,及以後有可能發生e5,所了e5錢比阿扁政府至少加幾十倍!
 
< 前一個   下一個 >