首頁 arrow 綠色短評 arrow 中國有人按呢teh摧殘民族幼苗!

中國有人按呢teh摧殘民族幼苗! PDF Print E-mail
Written by 李南衡   
Friday, 07 June 2013
五月二七,中國維權女士葉海燕拚去海南島萬寧市第二小學校門口、佇大日頭下面抗議三點鐘,伊kah三位抗議人士夯抗議牌仔頂面寫講:「校長,開房間chhōe我,放小學生去。」五月三十,葉海燕轉到廣西玉林博白縣的厝裡,͘十一名不明身分的查埔查某入去伊厝內tio̍h傷,續落去hông掠去該縣城關派出所關到ta猶未放出來。六月初三,伊的四名律師去城關派出所抗議,mā hông押入去派出所關起來。Chit-ê消息佇網路傳遍中國,包括藝術家艾未未在內真濟人佇網路頂面表示聲援葉海燕,刊出家己的相片而且留話講:「校長,開房間chhōe我,放小學生去。」特別引起人注意的是中國知名女學者、廣州中山大學教授艾曉明,手夯剪刀、一個面氣phut-phut,頂身無穿衫、佇身軀頂寫:「開房間chhōe我,放小學生去,放葉海燕去!」艾教授足受氣講:救小學生,反抗性暴力!艾教授褪掉家己頂身的衫,明明就是liahchit-ê國家的內褲!

 

代誌是按呢發生的:五月初八,海南省萬寧市的後郎第二小學傳出有六名女學生集體失踨,其中上細漢的才十一歲、上大漢的十四歲,經過家長追查,才知影是͘陳在鵬校長kah萬寧市政府一個官員chhōa去開房間。五月十三經過媒體報導了後,警方猶koh講是女學生拐校長去開房間。引起一向關心人權維護人權的葉海燕拚去海南島抗議。Khah hō͘人頭殼起gông的是,為啥物抗議小學校長性侵犯女童的葉海燕會遭受tio̍h一個接一個的打擊報復?群眾是去拍陳校長kah政府官員是去拍抗議的葉海燕,警察是掠陳校長kah政府官員去關,是掠抗議的葉海燕去關,而且叫厝主mài koh租厝͘葉海燕。總講就是政府當局為tio̍h「維穩大局」,無管女童的人權,致使主張人權的行為煞變作犯罪行為。

廣州市婦女聯合會負責人講,過去三年,廣東有超過兩千五百0六名女童遭受過性侵犯,其中差不多一半是十四歲以下的少女;垃圾代愈iah愈濟,二十工內,中國iah出八件學園性侵事件:除了海南省萬寧以外,五月十五,iah安徽潛山小學校長十二年性侵九名女童;五月十八,iah安徽舒城男教員猥褻七歲女生;五月二十,iah山東青島幼兒園保安猥褻兒童;五月二一,iah河南南陽教師猥褻二十名幼女、湖南嘉禾小學老師猥褻真濟名女生;五月二二,iah廣東雷州小學校長性侵兩名女生;五月二七,iah廣東深圳男教師猥褻四名學生。今年六月初一是國際兒童節,中國網路熱烈建議今年兒童節主題訂作:「放囝仔去!」

聲聲句句講「民族」按怎按怎的中國,那像「民族」hông bē講得、hông bē磕得。咱看有人按呢teh摧殘民族幼苗,敢無夠諷刺?

※週一8點整、13點整、17點整於電台播出。

 
< Prev   Next >