首頁 arrow 綠色短評 arrow 任何人都m7是一粒孤島

任何人都m7是一粒孤島 PDF Print E-mail
Tuesday, 20 May 2008
五月初三,緬甸hou7暴風雨拍到東倒西歪,第一時間,外國e5救援人員、醫療用品及食物等救援物資,攏hou7緬甸軍政府擋le3,無法度入去緬甸災區,連記者ma7 tioh7偷偷仔走入去報導hou7緬甸外面e5世界知影。到第六工,大城仰光開始進行重建,不過全國大部分e5地區攏猶斷水斷電。 美國駐緬甸代理大使,擔心災區嚴重缺乏糧食及食用水,而且屍體腐化、衛生條件誠bai2,死亡人數可能已經超過十萬人,需要趕緊救援e5災民至少有一百五十萬人。包括中國及泰國等東協國家苦勸緬甸頭人「tioh8及國際社會溝通」,按呢才答應外國e5救援物資、救援人員會使入去緬甸災區。聯合國秘書長潘基文tioh8 koh三番兩次拜託緬甸頭人,盡量放寛救援人員e5限制。   緬甸風災一禮拜後e5五月初十,緬甸政府才批准第一個救援團體-無國界醫師e5專機入去,另外有三台載滿救援物資e5專機ti7五月十二到緬甸,攏總運送一百五十噸e5救援物資去災區。目前無國界醫師有千外名救難人員ti7緬甸災區。一般e5國家若是有災難,聽講無國界醫師欲來救援,感恩歡迎都be7赴,那有可能ka7阻礙?啥人ma7想be7到,無國界醫師上蓋急e5是,一大堆一大堆救援物資無法度順利入去緬甸,一大陣醫療人員無法度入去緬甸、猶teh等候緬甸政府發e5簽證;in ti7緬甸救援第一線上大e5困擾是受tioh8緬甸地方政府愈來愈大e5限制;hou7 in上煩惱e5是,災區實在足需要救援物資及食用水,擋ti7國外無法度趕緊運來。In發現災民已經有lau3屎e5現象,確實會hong5煩惱,緊用發電機具,來hou7災民飲tioh8清氣水。   看tioh8 chia 個消息,實在hou7人足haiN3頭。世間竟然有chit種完全無管人民死活e5政府!   一九九九年咱台灣發生九二一大地動e5時,無國界醫師及日本德洲會e5醫療人員二十四點鐘內趕到台灣,hou7咱全台灣大大細細攏真感動真感謝。那像日本德洲會創辦人德田虎雄講e5一句話值得咱深思:「祇有生命是平等e5。」看tioh8緬甸政府e5作法,koh khah hou7咱對獨裁者e5厭sian7及受氣!   我想起ti7東海大學讀冊e5時,一位外國老師教阮唱e5歌:「任何人都m7是一粒孤島,任何人都是m7孤單徛le3;每一個人e5歡喜就是我e5歡喜,每一個人e5悲傷ma7是我e5,我需要你,你需要我,我欲為這拍拼。每一人都是我e5兄弟,每一人都是我e5朋友。」我足希望有機會,會tang3教緬甸e5頭人唱〈任何人都m7是一粒孤島〉chit首歌。(080516)
 
< Prev   Next >