首頁 arrow 綠色短評 arrow 大學校園蔣介石銅像beh按怎處理?

大學校園蔣介石銅像beh按怎處理? PDF Print E-mail
Written by 李南衡   
Friday, 14 June 2013
解嚴後,全台灣掀起反對校園內chhāi蔣介石銅像的聲浪。1999年台灣師範大學有學生提出拆除蔣介石銅像的議題,但是多數老師反對,會中決議成立校園生態規劃小組。每年有新生入來有畢業生出去,時間一下久chit項代誌煞無人去追查。事實上真濟年來,師大的學生定定蔣介石銅像the̍h來裝siáu-ê伊戴草帽仔、͘伊捧花、伊化裝作一個查某人等等。2011年三月十六,師大門口的蔣介石銅像徙去樹仔腳歇涼,門口恢復師範學院時代噴水池的景象。聽講並是校方順應學生的「民意」,是因為一寡中國的大學教授學生來訪問的時無愛佇校門口翕相,因為hiachhāi一身蔣介石銅像,而且最近台師大有招收中國學生,所以才會遷徒掉銅像。但是校方講完全無政治考量。

 

2012年二二八紀念日透早,「成大零貮社」佇成功大學校園內舉行二二八紀念儀式,號名作「威權未死,傷害猶存」。佇蔣介石銅像正手掛假人(象徵遭受蔣介石迫害的人),一塊油漆噴紅的大塊牌仔頂面寫「1949—2112」;銅像四箍圍有黏六百外張卡片,頂面寫二二八事件受難者的姓名,頂面才潑紅kih-kih的油漆,象徵受難者的血猶ta,來表達反威權,要求學校徙掉銅像。Chit項代誌引起成功大學甚至全台灣各大學無仝的聲浪。今年一月初九,成功大學倩吊車來懸兩米八的銅像吊去八樓,安置佇校史室的角落。成功大學台文系學生陳亭羽講:chit-ê行動表示校方到路尾猶原有正視學生反威權的訴求。

今年五月二二,國立政治大學學生議會舉辦「蔣公愛無愛」辯論賽決賽。針對「蔣介石銅像應撤出政大校園」議題辯論。正方三位ùi「轉型正義」角度出發,認為蔣介石歷史上是有爭議的人物,戒嚴時期真濟政策造成台灣人民的痛苦,銅像撤出校園算是政府為過去的錯誤作彌補的一種方式,佇校園chhāi伊的銅像有美化爭議人物的效果,有爭議的銅像應該撤出校園。反方三位提出,政大校園內的蔣公銅像對培養大學內的多元文化有幫助,教育後代m̄-thang bē記得歷史的教訓。雙方辯論激烈,重點是主張銅像應撤出校園的正方辯嬴,是chit-ê活動對培養大學生思辨能力有真大的幫助。

 

相信現此時的大學生攏是1980年代以後出世的,mài講蔣介石、「二二八事件」,事實上連蔣經國、「美麗島事件」in mā無看tio̍h。好佳哉有歷史紀載!總是歷史有各種無仝的紀載、甚至有天差leh地的解說,看in按怎理解吸收。一寡大學內底的代誌,mài逐項都由校方決定,上好是小問一下大學生的看法,in應該有值得參考、無仝的思考方式。敢是?

 

 

※週一8點整、13點整、17點整於電台播出。

 
< Prev   Next >