首頁 arrow 綠色短評 arrow 馬英九總統實在是有夠戇面!

馬英九總統實在是有夠戇面! PDF 列印 E-mail
2008/05/27, Tuesday
馬英九欲就任總統e5前一工、五月十九,台灣欲加入世界衛生組織大會(WHA)做觀察員koh hong5拒絕。咱e5邦交國甘比亞代表,呼籲世界衛生組織大會應該邀請台灣出席做觀察員,伊講,世界衛生組織大會拒絕接納台灣,m7但損害兩千三百萬台灣人民e5健康權利,ma7 hou7國際醫療衛生系統出現一個破孔。 事實就是按呢,頂擺中國SARS侵入台灣,造成台灣人e5傷亡及be7算得濟e5損失,就是因為台灣hong5排除ti7國際衛生防疫體系外面所造成e5。及咱無邦交e5美國代表講,美國一向支持台灣成作世界衛生大會觀察員。雖然有幾個國家ti7幕後參詳欲按怎來運作,可惜台灣加入世界衛生大會觀察員e5提案ma7是無法度列入今年大會e5議程。   Chhoa7中國代表團出席會議e5中國衛生部長陳竺講,目前中國大陸e5安排會tang3 hou7台灣醫療健康e5需要得tioh8完全滿足。借問一下:目前中國到底對咱台灣醫療健康e5需要,bat做過啥物款e5安排?   五月、中國四川大地動,台灣各界發起救災捐款,用專機載救濟物資直接送到四川,甚至趕緊用紅十字會名義派救援隊到災區。咱按呢做,完全是徛ti7人道e5立場,世界上任何遭遇災難不幸e5人,無管伊是to2一國e5人、ma7無管咱有熟悉抑無,攏是咱e5厝邊、咱e5兄弟。你敢知影中國按怎講?in講,台灣人民充分發揮tioh8同胞愛。而且講,ui3四川震災台灣人慷慨捐款捐救濟物資chit點來看,台灣中國原本就是仝一個國家、仝一個民族。所以台灣根本無需要加入啥物國際組織,包括世界衛生組織ma7攏免參加!聽tioh8你會phui3血抑be7?有影是好心hou7雷chim!實在是看tioh8鬼! 五月二十,馬英九就任台灣總統講演,繼續teh練siau2話,講啥物「不統、不獨、不武。」而且呼籲中國「外交休兵」,那像拜託中國mai3 koh ti7國際上打壓台灣,留一條活路hou7台灣行。講tioh8那像台灣海峽兩岸e5和平日子就隨時來ah!拜託馬英九總統m7 thang koh眠夢ah! 上蓋hou7咱聽tioh8受氣e5是,馬英九及中國頭人攏講欲ti7「九二共識」e5基礎頂面恢復協商。咱攏知影,「九二共識」是二000年四月民進黨ti7總統大選選贏了後,中國國民黨移交政權進前,當時陸委員主委蘇起所發明e5。 Ui3一九九二年到二000年之間,海峽兩旁e5政府根本就無人bat講過、ma5無人知影「九二共識」chit句話。今仔日,馬英九及中國頭人攏講欲用完全無e5、一個白賊e5「九二共識」作基礎。你講馬英九總統是m7是有夠戇面?
 
< 前一個   下一個 >