首頁 arrow 綠色短評 arrow 貪貪貪的馬政府!

貪貪貪的馬政府! PDF 列印 E-mail
發表者 李南衡   
2013/07/12, Friday
「國際透明組織」是一個國際性非政府、非營利組織,伊的任務是beh(ah)制全世界貪污kah腐化,國際秘書處設佇德國柏林,台灣透明組織tī 2002年九月二八成立,屬亞洲太平洋部。《2013年全球貪腐趨勢指數》調查報告是針對107國,ùi舊年九月到今年三月。七月初九,英國《經濟學人》雜誌引用「國際透明組織」ta-á出爐的調查報告講:台灣接觸公部門內的民眾中,有36%受訪者承認bat向官員「烏紗」過,比全球平均的28% khah懸,佇回答政府是是徛佇大企業利益hit旁的題目時,有71% 的受訪者認為「是」,比全球平均的53% khah懸。͘ 中國國民黨的馬政府上食消的是全球95個國家貪污賄賂上嚴重的國家,台灣以36% 的貪污指數排第十八名,佇亞洲干單嬴柬埔寨一個,kah印尼做夥排佇第二名,算是重度貪污的國家。是「國際透明組織」二十年來作調查,台灣上蓋衰尾的一遍,當然明年是是會koh khah bái,猶知咧!

 

一直強調清廉的馬英九一個面囥佇土腳hông踏,怪講作調查的是設佇上海的「慧思公司」,當然會有失真。按呢tio̍h真害囉!馬政府簽署的兩岸服貿協議,講會開放中資來台投資「市場研究服務業」,ta中國的民調公司調查tio̍h出現會͘馬政府質疑的問題,將來佇台灣的中資民調公司調查恐驚會koh-khah濟爭議,歸尾反對服貿協議的是馬政府。見笑代無舞khah大,那像驚人知!外交部隨時命令駐德國代表處接洽「國際透明組織」,瞭解in取樣的標準、kah in溝通澄清kah反駁,要求駐英代表處寫批去向《經濟學人》雜誌澄清反駁。

「國際透明組織」所做的調查報告敢有亂亂講?法務部長曾勇夫質疑報告中所提的36%數據,伊講過去法務部委託調查是3% niā-niā,差十外倍。七月初十《蘋果日報》作一項民意調查,問講:國際報告你敢有信?有75.07%受訪者相信chit份報告,甚至認為「貪污實際情形koh khah嚴重。」曾部長koh講往年調查攏有中國,今年跳過。中國橫覇,聲明拒絕受調查,你敢有法伊?準有調查中國,中國有可能排佇亞太地區貪污第二名,台灣變作第三名,按呢加偌有面子?

 

阮作囝仔的時陣真愛唱語言學家趙元任寫的一首輪唱的歌《唱唱唱》,歌詞是按呢:唱唱唱,我先唱,你後唱,咱的調攏仝樣,總是你攏tòe bē tio̍hkohùi頭唱唱唱,我先唱,你後唱‧‧‧我歌詞「唱」字改作「貪」字變作:貪貪貪,我先貪,你後貪,咱的步數攏仝款,總是你攏tòe bē tio̍h,(政黨輪替了後)kohùi頭貪貪貪,我先貪,你後貪‧‧‧。Chit首歌好佇永遠唱煞。相信歌詞改了,馬政府的官員應該攏會足愛唱、koh煞!

 

 

※週一8點整、13點整、17點整於電台播出。

 
< 前一個   下一個 >