首頁 arrow 綠色短評 arrow 笑吳伯雄三聲!

笑吳伯雄三聲! PDF Print E-mail
Tuesday, 03 June 2008
五月二六,中國國民黨主席吳伯雄chhoa7一陣人去中國訪問,第二工ti7南京去中山陵拜孫中山,祭文一開始就念「維中華民國九十七年五月二七日」,拜了,吳伯雄題詞「天下為公、人民最大」八字,落款寫二00八、五、廿七。咱欲笑吳伯雄一聲,祭文是念hou7死人聽e5,伊敢念「維中華民國」,ma7及中華民國已經死去ah會合。 寫he八字是寫hou7活人看e5,伊m7敢題「中華民國」抑是「民國」幾年。伊按呢做ma7是hou7全台灣e5人知,「中華民國」實在是提be7出去!咱早早就按呢講,中國國民黨死鴨仔硬嘴poe罵咱一大堆歹聽話。我看,chit塊看板愈早tan3掉愈好!咱笑伊猶未煞,五月二八,台灣e5交通部官員講郵票頂面印e5「台灣郵政」欲koh改倒轉「中華郵政」,公司名無hiah呢急,照立法院要求會ti7十月進前改好。恁明知中華民國提be7出去,阿扁政府用心計較ka7改作「台灣郵政」,恁上台了後激恬恬就好ah,何mi2苦無十工就硬koh改倒轉去「中華郵政」咧?   吳伯雄拜in中國國民黨e5「總理」孫中山了後,講伊兩千年有去中山陵,hit當時中國國民黨ti7台灣失去執政權,伊感覺真見笑,這八年經過兩遍重大選舉,今仔日中國國民黨koh重新提tioh8執政,伊會使告慰「總理」在天之靈,希望總理會使安息。咱欲笑吳伯雄第二聲,因為孫中山根本無知中國國民黨tang時仔用軍警特霸佔台灣,孫中山在生e5時bat來台灣,伊kan-taN知影台灣是日本e5殖民地nia7nia7。若是孫中山「在天之靈」會知影chit幾十年e5時勢變化,ma7會曉講話,孫中山應該會問講:你是按怎八年才來看我一遍?我所創立e5中國國民黨chit陣走路去to2位bih?中國國民黨無koh再重新提tioh8歸個中國e5政權,欲「告慰」我啥物?失去歸個中國e5政權,欲叫我按怎「安息」咧!聽講你明仔載欲及一九四九年ka7中國國民黨掃出中國大陸e5中國共產黨頭人食飯,你那有面及人食飯?你實在是「大面神」koh兼iau鬼!   吳伯雄腳踏tioh8中國e5土地,歸個人隨時倒kiu去,kiu到親像一身細細身尪仔(流行語講作「公仔」),伊明明ka7孫中山講中國國民黨ti7台灣koh重新提tioh8執政,敢m7是講選贏koh換中國國民黨提名e5馬英九做總統?那會ti7中國人面前m7敢稱呼伊是馬英九總統,叫伊「馬先生」咧?實在是真好笑!原來頂擺中國國民黨前主席連戰,去中國及中國頭人講欲聯共制台獨e5意思,敢講是連台灣e5總統ma7反在內,若講台灣有「總統」就是台獨分子? 咱笑吳伯雄三聲,實在笑tioh8會流目屎!
 
< Prev   Next >