首頁 arrow 綠色短評 arrow 做官的有影有兩支嘴?!

做官的有影有兩支嘴?! PDF Print E-mail
Written by 李南衡   
Friday, 19 July 2013
七月十七,「台灣競爭大論壇」公布「2013年台灣幸福大調查」民調結果,縣市長施政滿意度排名,基隆市長張通榮險險差一點吊車尾,因為in仝中國國民黨的南投縣長李朝卿涉貪hông起訴,幾年來基隆市長獨占的上尾仔名搶去,基隆市長張通榮才會當進步變作尾仔第二名。

 

張通榮市長會tàng kā基隆市舞kah chiahàu,無可能是伊家己一個人做得來的,市府各處、局、所攏加減有責任;那像馬英九總統滿意度會落到13%,行政、司法、考試、監察、立法五院攏有責任,甚至各部、會、署、總處、委員會有責任,若無,干單一個馬總統那有可能台灣舞kah chiah呢悽慘落魄咧!

 

七月十三,蘇力風颱真無意思,基隆市暖暖區親水公園的涼亭仔的橫樑吹斷lap落來,才͘民眾發現橫樑內底竟然攏是pho-lí-lóng,趕緊the̍h手機仔起來翕相作紀念,罵講:「Che根本就是偷工減料!」七月十四,基隆市政府堅持講he m̄是偷工減料、橫樑的材質無問題,會倒去是因為風颱傷大。那像有人買厝會問講chit間厝敢會漏?賣主應講:be,阮chit間厝若無落雨漏,無像桃園機場大廈hiah呢差、無落雨mā teh漏。市民罵講那有人橫樑內底攏chipho-lí-lóng?市政府工務處養護工程科長解釋講,橫樑內底是高密度EPS聚苯板,是低密度的聚苯乙烯pho-lí-lóng,兩項無相仝。那像豬哥亮的電視廣告:「舒舒有兩種。」你敢分會清楚?七月十五,基隆市政府開記者會表示,攏是市民害的,原設計是景觀花架工程,結構無問題,攏因為市民要求加khàm浪板遮雨,才會͘風颱吹歹去。但是有可能良心發現,補一句講,市民要求加khàm浪板遮雨,有可能重量無計算好勢,才會無法度承受蘇力風颱來掃,m̄-nā浪板吹掉,連下面的橫樑也受tio̍h破壞,才͘市民看tio̍h 白白的EPS聚苯板。

͘咱想起六月初八beh晝十一點外,基隆火車頭邊仔͘人行的陸橋「中山橋」忽然間斷去,行佇橋頂的一位小姐摔落來,好佳哉無生命危險。市民發現陸橋斷去的所在無鋼筋,內底干單有柴枋kah pho-lí-lóng,罵講市政府施工偷工減料!基隆市府表示,斷去hit位拄拄是轉彎的所在,是橋樑伸kiu縫的位置,結構上無需要使用鋼筋,少量的填充物並影響安全。影響安全?橋那會斷去?人那會摔落來?市府koh講中山橋會斷去,有可能因為橋墩是圓孤形的,重心無平衡,地動造成橋墩移位,橋才會斷去。

講歸晡,攏是市民m̄-tio̍h、風颱m̄-tio̍h、地動m̄-tio̍h,官府攏無m̄-tio̍h,因為「官」字有兩支嘴?!

 

 

※週一8點整、13點整、17點整於電台播出。

 

 
< Prev   Next >