首頁 arrow 綠色短評 arrow 會曉算be7曉除e5環保署長

會曉算be7曉除e5環保署長 PDF Print E-mail
Tuesday, 10 June 2008
溫室氣體對地球溫暖化e5影響,全世界攏驚tioh8,若無改善,全世界e5人有可能攏會死了了,無重視「京都議定書」煞be7使。特別是咱台灣,無法度親像美國按呢激皮皮,因為咱台灣ti7國際上孤立無援無名無姓,無可能享受任何權利,但是咱若違反「京都議定書」e5要求,有可能會遭受tioh8國際壓力,制裁到hou7咱食be7消。所以咱一定tioh8愛來思考溫室氣體排放e5問題。 第一個想tioh8 e5當然是按怎減少排放量。照立法委員e5質詢,咱台灣一年排碳量是二億六至二億八公噸,台塑,加上最近有可能會通過e5大煉鋼廠及八輕,總排放量會佔全台灣總量e5六十六葩。政府是m7是應該重新評估,不准大煉鋼廠及八輕e5設立?德國、英國一寡煉鋼廠攏關門,ka7舊機器賣去中國,中國歡喜到欲死。chit陣才知死,中國因為增設一大堆歐洲拍落來e5煉鋼廠,致使中國碳排放量變作世界第二名,kan-taN輸美國nia7-nia7。   中國悲慘e5教訓,咱e5政府官員那有可能m7知?若知,是按怎欲批准設立大煉鋼廠咧?中國已經後悔都be7赴ah,咱chit陣才欲去做?六輕所帶hou7台灣e5污染,tioh8由台灣chit塊土地、空中、地下及海水來承擔,由現此時ti7台灣生活e5人及in e5子子孫孫來承擔。咱e5官員是按怎會m7知?若是知影,那會koh teh考慮啥物八輕咧?   第二個想tioh8 e5是種樹仔。馬政府宣示欲ti7台灣平地種六萬公頃e5樹仔。衛生署長沈世宏講,六萬公頃當然無夠。若是欲用造林來抵銷台灣一年e5排放量,保守估計tioh8種四個台灣hiah大e5森林。真遺憾e5是,立法委員質詢講,親像台塑早前講欲ti7台灣種偌濟樹仔,結果咧?講是ti7中國種樹仔,按呢做敢tioh8?咱偉大e5環保署長沈世宏講:「he是一種替代方案」。伊講,因為二氧化碳排放會造成全球溫暖化e5危害,m7是kan-taN影響台灣nia7-nia7,這並m7是地區性危害。Hong5一下質問,伊講種樹仔「優先ti7台灣種khah好。」   外國e5「替代方案」,是好額國家早前去散鄉國家烏白thun2-踏、濫摻搶劫,逐個公認好額國家早早就享受過發展e5成果,而且ma7一直是二氧化碳上主要e5製造者。所以准in去散鄉國家種樹仔,算是一種賠罪,in所種e5樹仔ma7 hou7人認定,會使ui3 in國內e5二氧化碳排放量減掉。借問一下,咱台灣tang時去污染thun2-踏過中國,tioh8去ka7 in種樹仔賠罪咧?   沈世宏署長啊,親像台塑按呢,ti7台灣放雞屎,而後走去中國生雞卵。你koh敢講這是「替代方案」?聽tioh8實在「馬上」會氣死人!
 
< Prev   Next >