首頁 arrow 綠色短評 arrow 請hō͘我真相!一個上卑微的要求

請hō͘我真相!一個上卑微的要求 PDF 列印 E-mail
發表者 李南衡   
2013/08/02, Friday
六月二三,陸軍六軍團湖口裝甲542旅下士洪仲丘收假轉去部隊的時,因為帶有翕相功能的手機仔,講伊違反資訊安全保密規定。照規定極加是申誡,但是部隊堅持伊關禁閉七工,六月二八送去269旅關入去悔過室,七月初一開始操,七月初三室外溫度已經達到「紅旗警戒」á,照操,下晡五點半煞暈倒在地。六點外送去楊梅天成醫院急救,koh轉診去國軍八0四醫院,才koh轉台北三軍總醫院副院長、中署(tio̍h痧)防治中心主任朱柏齡醫師講,伊自了m̄-bat看過中署四十四度chiah呢高溫的患者。檢查了才知影洪仲丘的腦病變、心臟病變、肝、腰子歹了了,全身軀攏是血水,七月初四透早,koh三工tio̍h beh退伍、歡喜beh轉去成功大學讀伊先來做兵保留學籍的研究所、chit-ê二四歲少年家洪仲丘硬硬͘kah死。

 

以往有台灣青年去做兵,有的才去四十天,有的連鞭beh退伍,莫名其妙重傷、失踨抑是自殺,家屬一點仔辦法都無。真有可能受tio̍h江國慶枉死案的影響,chit遍各新聞媒體拚勢去挖消息,各種人提供消息͘媒體,各路名嘴發表五花十色的評論。有一位名嘴陳揮文佇「飛碟電台」節目中,批評洪仲丘的阿姊「愈來愈離譜!」「講國防部抹烏、有àu步,有啥物證據?」「國防部講國賠也hông講,無講也hông講,你beh叫國防部按怎才好?」「國防部長無愛做á,高華柱無戀棧官位、陸軍旅長應該挽掉to̍h挽掉á。」「Tio̍h愛按怎伊(洪慈庸)才接受?」

陳揮文記得家己是啥人?那像國防部發言人的氣口。新聞報導講國防部behin家屬一億,追升伊中士,beh hō͘伊入去忠烈祠。無一項是洪家大姊講的;國防部長落台、陸軍旅長挽掉,mā m̄是洪家大姊要求的。洪家大姊成個月來堅持要求一點:請͘我真相!一個chiah呢卑微的要求敢有過份?敢有離譜?

七月三十一,國防部軍檢洪仲丘案專案小組偵結,起訴五四二旅旅長沈威志少將等十八名軍士官。歸本起訴書完全看無「真相」都真悲哀á,koh thiâu工佇起訴書先已經死去講話的洪仲丘抹烏,有夠夭壽!寫出一段自了m̄-battio̍h的,講洪仲丘靠勢連鞭beh退伍,偷改體測成績,無愛phāi值星,才會引起長官不滿。假使若有影按呢,旅長副旅長政戰主任hiah大的官是按怎一定beh關伊?kah伊有啥深仇大恨?假那洪仲丘會死,是家己作得來的。白紙寫烏字的抹烏、àu步,拄好塞陳揮文的嘴:「講國防部抹烏、有àu步,有啥物證據?」

陳揮文問講:「Tio̍h愛按怎伊(洪慈庸)才接受?」阮實在想曉,chiah呢簡單、chiah呢清楚「人類的話」:「請͘我真相!」陳揮文那會聽攏無咧?

 

 

※週一8點整、13點整、17點整於電台播出。

 
< 前一個   下一個 >