首頁 arrow 綠色短評 arrow 烏白拍la7涼e5衛生署長

烏白拍la7涼e5衛生署長 PDF Print E-mail
Tuesday, 17 June 2008
今年腸病毒e5疫情那像愈來愈嚴重,到六月十一為止,已經有一百八十一個病例,有六個人死亡。這是十年來仝時期上蓋懸e5紀錄,而且有專家煩惱koh續落去一兩禮拜會koh khah嚴重,驚會突破三百四十個病例。衛生署長林芳郁ti7立法院備詢e5時表示,預計腸病毒疫情koh過兩禮拜應該tioh8會tang3得tioh8控制。當媒體koh進一步追問講:假使兩禮拜後若無法度控制tiau5欲按怎?衛生署長林芳郁滾笑應講:「按呢tioh8祈禱。」 咱m7知是按怎ti7 chiah-nih緊張、人命關天e5時陣,主管全國人民衛生健康、性命安全大責任e5衛生署長猶有心情拍拉涼!   咱知,ti7國際貿易船載e5條款內面,有一條叫作「不可抗力e5原因」,致使船運延期抑是無法度交貨,任何一方都免負任何賠償責任。「不可抗力e5原因」包括:戰爭、政變、罷工、封銷等人為因素以外,猶koh有一大類叫作「神e5旨意」,就是咱講e5天災地變,包括地震、風颱、海漲、做大水等等。咱一般講tioh8靠祈禱求神e5應該是指chit部分。   聽tioh8衛生署長林芳郁講兩禮拜後若猶無法度控制疫情「按呢tioh8祈禱」,hou7阮驚一跳,掠準行政院衛生署欲大改租,也就是衛生署內e5一大堆單位,像講醫事處、食品衛生處、護理健康照護處等等,甚至各附屬機構,像講國民健康局、疾病管制局、藥物食品檢驗局等等,攏總欲廢掉,同時增加一個新單位:「祈禱局」,由衛生署長林芳郁兼任「祈禱局」局長。   想想一下,ma7 m7 tioh8,林芳郁雖然官大學問大,但是,祈禱無一定tioh8會贏過基督教e5牧師、天主教e5神父、道教e5法師、抑是佛教e5師父,甚至一般虔誠祈禱e5平民。我建議祈禱e5代誌猶原留hou7專業e5神職人員及一般人民,請林署長提出專業e5能力及道德良心來拍拼。   一個負責國家健康衛生大責任e5衛生署長,應該做e5是注意chit遍腸病毒e5疫情會koh khah嚴重抑be7?欲按怎控制?hou7全國人民知影腸病毒chit 個傳染病e5嚴重性,hou7逐個人知影腸病毒是經由腸胃道抑是呼吸道傳染e5,tioh8勤用雪文洗手。若是有囝仔感染tioh8腸病毒破病,無管症頭輕重,一定tioh8 ti7厝裡抑是病院休養,就有可能減少病毒e5散播機會。   若是一種傳染病控制be5 tiau5,負責全國衛生健康e5大官講「按呢tioh8祈禱。」實在會hou7人煩惱、ma7會hou7人驚。咱小百姓拜託林大官虎,ti7 chit個時陣敢會使mai3按呢烏白拍la7涼?
 
< Prev   Next >