首頁 arrow 綠色短評 arrow 你敢有看tioh8中國龜腳?

你敢有看tioh8中國龜腳? PDF 列印 E-mail
2008/06/24, Tuesday
這幾年,台灣、日本e5關係會使講是上好e5一段,除了日本對台灣人e5友誼之外,猶一點真重要e5是許世楷代表努力拍拼e5成果。Ti7 chit個時陣來發生咱e5海釣船「聯合號」佇釣魚台附近hou5日本海上自衛隊e5巡邏艦long3沈去e5不幸事件。日本海上保衛廳巡邏艦e5粗魯及鴨霸,咱當然tioh8嚴厲譴責,而且咱政府應該透過外交e5手段來要求道歉及賠償。咱佇chit個事件過程中ma7 看tioh8中國e5龜腳趖出來。 事件發生e第一時間,中國外交部隨時發表聲明譴責講:「中國台灣e5漁船按怎按怎」,無管彼陣江炳坤代表台灣海基會tng佇北京及中國e5海協會會談。問題是,江炳坤ma7攏無講半句話。實在是足奇怪!   六月十五半暝,有號作「台灣保釣行動聯盟」e5人一行十個人及一陣記者,坐船去釣魚台外圍se7一輪,因為政府驚in出代誌,特別派海巡署e5巡邏艦去保護in。日本海上保衛廳e5軍艦阻擋無beh hou in倚近去。咱ui3電視有看tioh8全程實況錄影報導。咱有聽tioh8內底有人hoah聲講:「免驚!咱e5行動大陸現此時攏有teh監視掌握!」伊講e5大陸就是講中國。   原本有中國國民黨e5立法委員講一定欲ti7六月十八坐軍艦去釣魚台「視察」,原本叫國防部長陳肇敏及in做夥去,陳部長無beh去。招民進黨立法委員做夥去,民進黨立委無愛插in,中國國民黨立委罵講無beh為台灣漁民去釣魚台宣示主權、為漁民拍拼,民進黨立委是台奸!有人煩惱按呢若是惹起戰爭beh 按怎?中國國民黨立委講,免驚!日本若敢拍咱,大陸一定會出面拍in!中國國民黨立委講e5大陸就是講中國。聽講接tioh8兩通電話,in就決定無beh去ah。   六月十七下晡馬英九總統佇總統府及記者飲茶講話,聽講伊已經忍七工ah,講tioh8釣魚台,馬總統講:釣魚台當然是中國、嗯中華民國e5。身為中華民國總統e5馬英九,敢講伊歸頭殼kan-ta想講釣魚台是中國e5?   有七個香港保釣運動e5人來台灣,原本beh租台灣漁船去釣魚台, In講in有chah三面旗仔beh去插佇釣魚台土地頂頭,一面中華人民共和國國旗、一面香港旗、另外一面是釣魚台行動聯盟旗。因為in是外籍人士,無法度租tioh8台灣漁船。六月十八下晡,in佇總統府頭前hoah口號:釣魚台是中國e5。而後入去總統府,m7知及啥人講話,講四十分。想tioh8頂日有忽然間無薪水thang 領e5遠東航空公司員工欲去總統府陳情,hou7警察擋佇大路。那會差hiah濟?   中國龜腳趖出來ah,你敢有看tioh8?
 
< 前一個   下一個 >