首頁 arrow 綠色短評 arrow 人民的不服從行動!

人民的不服從行動! PDF 列印 E-mail
發表者 李南衡   
2013/08/23, Friday
八月十八暗,佇總統府頭前有兩萬人thīn大埔拆政府集會,大聲喝:「國家還͘人民!」「昨昏拆大埔,今仔日拆政府!」、「豺狼治國、人民抗暴」各種口號。集會了有人喝聲beh去圍行政院,行到半路有人盤牆圍仔入去內政部門口埕,差不多有千外人。有人佇內政部門口壁頂貼字、噴字、有人佇土腳畫反暴政圖晝,無人kah警察起衝突。佔領內政部兩個出入口,天光內政部的辦公人員只好ùi偏門出入,下晡解散的時唱聲:Che是抗爭的開始,是抗爭的結束。

 

八月二一,潭美風颱逼近台灣,內政部長李鴻源坐鎮防災指揮中心,針對八一八民眾發起拆政府、佔領內政部的抗爭行動,表示內政部已經完成蒐(sō͘)證,若是抗爭民眾有破壞公物抑是違反集會遊行法,一定依法處理。伊講,人民有言論表達的自由,但是bē-tàng隨意破壞公領域、違反者會依法究辦。

有一位蘇小姐佇風颱天看tio̍h chit-ê報導真爽,佇伊的「面冊」頂面講伊是台北的上班旅,伊的祖厝mā m̄是佇苗栗,但是伊關心「大埔案」,伊有參與八一八行動,隔轉日為tio̍h「佔領」內政部請假一工。伊足驚惶的是一個國家那會tàng用暴力來對待家己的人民!風颱天佇厝裡上網,發起「萬人自首招募中」行動。引起網友熱烈反應,無一工tio̍h有成萬個網友講beh自首。有人講,Hit暗入去內政部門口靜坐,我有佇壁頂貼兩張貼紙,我自首;清華大學學生陳為廷佇面冊貼一張伊佇內政部門口睏的相片講:我自首,我有負責佇hia睏;中正大學副教授管中祥自首講:Hit暗我有去凱道kah內政部行行咧,拄tio̍h真濟老朋友、學生,互相關心、分享心情,然後翕幾張相片上傳去公民行動影音紀錄資料庫作即時報導,koh因為驚吵tio̍h附近的住戶kah佇台大病院住院的朋友,我有細聲罵政府罵幾聲。我有真濟朋友、學生、網友攏自首ah,為tio̍h無愛͘ in孤單,為tio̍h社會koh khah密切的連結,我mā chhap一腳!Hit暗「八一八拆政府」活動主辦者「台灣農村陣線」發言人蔡培慧強調,「自首行動」kah農陣無關係,但是網友自發的ê行動͘人真感動,顯示參與者攏有「公民不服從行動」的基本素養,願意承擔行動的後果。希望李鴻源正面看待人民的意見,若是畫烏漆白、貼紙hông當作廢棄物,內政部猶原堅持提告,農陣會面對承擔。

三年前,行政院長吳敦義、內政部長江宜樺、苗栗縣長劉政鴻向大埔幾戶所作的承諾:「原屋保留、劃地還農」,今年七月十八kângkah平平,政府背信在先,人民抗議在後,政府猶有啥物面講「依法」辦chiah-ê人咧!

 

對不公、不義、不法的政府,人民當然有「不服從行動」的權利!

※週一8點整、13點整、17點整於電台播出。

 
< 前一個   下一個 >