首頁 arrow 綠色短評 arrow 中國傳染病欲來「解放」台灣?

中國傳染病欲來「解放」台灣? PDF Print E-mail
Friday, 27 June 2008
五、六冬前e5十月二五,我有寫一篇文章講:台灣那有「光復節」?若有,十月二五是紀念中國傳染病「光復」台灣e5日子。原本ti7日本殖民統治台灣二、三十年後,就攏choe7無影e一寡法定傳染病,停戰中國國民黨政府來佔領台灣了後,隨時koh來,三、四年就奪去十外萬台灣人e5性命。 Chit遍中國國民黨候選人馬英九當選台灣總統,決定欲照競選所講e5,ti7七月初四開放兩岸週末包機直航。五月二十就任了後,就派江炳坤去中國交涉直飛事宜。台灣一下手開放桃園、高雄小港、台北松山、台中清泉崗、嘉義、花蓮、台東、馬公八個機場。除了桃園及高雄小港兩個是國際機場,其他六個機場原本攏是國內機場,有啥物施設、欲按怎因應ui3中國來e5觀光客?   咱m7但擔心移民局、海關有準備好抑未?koh khah煩惱e5是咱衛生署有準備好抑無?大話新聞主持人鄭宏儀所講e5及中國衛生部所公布e5資料綜合起來看,確實會hong5驚。中國tioh8 Malaria e5人有六萬兩千人(咱台灣是無半個),B型肝炎有一億三千人,二00七年底愛滋病有七十萬病例,腸病毒(中國叫作手口足病)有一萬五千人。上會hong5驚e5是「肺癆」,將近全國人口四成半、也就是五億五千萬人感染過,每年死亡十三萬人,現此時有病在身e5有四百五十萬人,其中有一百五十萬人是會傳染hou7別人e5,也就是咱所講e5「開放性」肺癆,每一個患者每年有可能傳染hou7十至十五人,目前有teh接受治療e5有六十萬人,就是講另外hia e5三百九十萬個「開放性」肺癆患者無人管無人liu5。無偌久進前,台中有一個「開放性」肺癆患者無欲去病院接受隔離治療、四界pha-pha走,全台灣大緊張那親像tu2 tioh8大強盜大殺人犯,趕緊ka7掠去病院隔離治療。別項傳染病mai3講,Kan-taN肺癆chit項,若有三、五個中國「開放性」肺癆患者soan入來台灣旅遊,咱台灣隨時就會大亂!   目一下nih,七月初四就到ah,民進黨立法委員歸工teh責問衛生署無控制腸病毒,是按怎無欲責問衛生署,中國觀光客隨時欲來,防疫措施有做抑無?ti7原本e5六個國內機場到底按怎做?ma7講一下hou7咱知影。民進黨立法委員實在tioh8愛大大加油!咱ma7欲請問馬英九總統,你e5衛生署團隊敢有準備好ah?拜託m7 thang親像你做台北市長按呢,看SARS phu2-phu2 ah,歸尾是SARS看你Bu7-bu7!hou7你舞到險險be7收山,好佳哉當時e5阿扁總統出手。現此時,你是台灣總統,頂頭無人ah neh,你若猶原激khou3-khou3,中國傳染病「馬上」就會來「解放」台灣,免用一兵一卒就會hou7台灣人死一遍!
 
< Prev   Next >