首頁 arrow 綠色短評 arrow 嘉義芳瓜阿嬤散罔散,足有骨氣kah尊嚴!

嘉義芳瓜阿嬤散罔散,足有骨氣kah尊嚴! PDF Print E-mail
Written by 李南衡   
Friday, 30 August 2013
八月二二潭美風颱帶來的大雨,淹tio̍h嘉義縣朴子市庄下一大坵芳瓜園,原本預定七月半中元會tàng收成賣khah好價的芳瓜,煞泡佇水裡。農會貸款的三十萬煞泡佇水裡,連飯都無thang食,koh老翁中風住佇病院一個月tio̍h兩萬三千箍。莫怪芳瓜阿嬤會捶心肝、háu講「Tabeh按怎才好咧!」八月二四,嘉義縣長張花冠來看依,八十五歲的芳瓜阿嬤煞má-má哭,關心依慰問伊的人the̍h hō͘伊的紅包攏jîm-jîm出來、攏總有兩萬四千箍交͘張縣長講:請你the̍h hō͘比我khah需要的人。張縣長講,現此時你就是上需要的人,請你收咧。芳瓜阿嬤堅持錢交͘張縣長,請張縣長轉交͘ koh khah需要的人。張縣長由立委陳明文kah朴子市長王如經陪同去探訪芳瓜阿嬤的時,有看tio̍h歸車的芳瓜,chit水原本預定會tàng收成一萬五千台斤的芳瓜,若中元收成,一台斤會tàngkah五六十箍,比平時加一二十箍,攏總差不多會tàngkah七八十萬,若khah好價會tàng賣到八九十萬。那知中元節前風颱帶來大雨,歸園的香瓜攏總泡佇水裡。佇大雨中雖然有搶救一小部分、大約才六百台斤niā-niā,因為賣相歹看、水果販仔無beh收買。張縣長試食了認為甜度有十二度以上,伊有請朴子市農會協助收購,減少in的損失。而且張縣長已經指示水利處了解竹村里淹水的問題,chhōe出解決的對策,爭取中央支持鴨母寮排水整治工程,徹底解決當地淹水問題。

 

「香瓜阿嬤」的故事傳出去了後,嘉義縣政府、朴子市公所、里長辦公室的電話攏接離。有熱心的網友發起「幫忙嘉義朴子的香瓜阿嬤」活動,號召逐個幫忙八十五歲種芳瓜的陳阿嬤度過難關,隨時有二萬五千外人按「讚」支持。嘉義縣長張花冠佇網路頂面有回應網友講,對民眾關心疼惜芳瓜阿嬤͘人真感動,總是芳瓜阿嬤認為別人的錢是艱苦錢,伊bē-tàng按呢kâng收,請伊轉交͘比伊khah需要的人,已經有照依的意思轉交͘聖心教養院kah敏道家園。張花冠縣長有佇網路頂面留話說明:事實上朴子市建設科新聞猶未報導進前,tio̍h已經有按農災查證kah查報程序錄案辦理,建設課莊課長有去探訪芳瓜陳阿嬤,詢問伊的災損情形。目前朴子市公所有照政府災損補助管道去幫助伊。日後,猶原會請里長、里幹事去探視伊的需要,再來做下一步的協助。

香瓜陳阿嬤講伊的第二子kah孫仔認真清理芳瓜園,決定beh買新的芳瓜幼苗來重新開始,多謝逐個的關心kah疼痛。網友聽tio̍h芳瓜阿嬤koh徛起來的消息攏真歡喜,佇網路頂面發起beh按怎預購芳瓜阿嬤下一季的芳瓜!

 

 

※週一8點整、13點整、17點整於電台播出。

 
< Prev   Next >