首頁 arrow 綠色短評 arrow 香港民主遊行行倒退!

香港民主遊行行倒退! PDF Print E-mail
Thursday, 10 July 2008
今年七月初一是香港回歸中國十一周年紀念日,及永年仝款,香港民間團體出來遊行,講欲爭取二0一二年直普選,無愛二0一七年假民主。今年e5主題是:仝一個夢想、仝一個人權,還政於民,改善民主。 舊年十周年紀念遊行不止轟動,連自了m7 bat參加遊行e5天主教香港主教陳日君都行出來,伊講:香港現在“一國”壓制“兩制”,過去傳統文化倒退,禮義廉恥攏無去ah!流行文化變作phou5 thaN2權貴、欺壓弱小。壹傳媒集團主席黎智英ma7參加遊行,伊講希望香港盡量有普選。舊年參加遊行e5人數是幾年來上濟e5一遍,有六萬八千外人。   今年e5遊行那像是一個例行e5活動而已,比舊年減少兩萬一千外人,chhun四萬七千人,中國新華社引用警方e5數字是一萬五千五百人,koh khah少!我認為人數減少m7是上主要e5問題,上主要e5問題是無行動、口號喝久會麻痺。而且in希望二0一二年會tang3直接普選。In講無愛二0一七年e5假民主。事實上,連二0一七年會tang3直接普選抑be7 ma7猶是問題。中國中央若是無欲hou7香港直接民選,香港人敢會tang3按怎?敢敢按怎?民主人權m7是天落落來e5,是拼生拼死爭取來e5,中國中央看香港人過過。   今年遊行koh khah hou7中國中央看be7起e5是,遊行隊伍內底有兩支特別hiaN2目e5布旗,一支是蔣介石,一支是馬英九。香港人講欲爭取人權、爭取民主、爭取普選,欲學台灣,卻誤會這兩個是代表台灣e5民主自由及人權。In m7知影這兩個tu2-tu2是上蓋反民主、反人權、反普選e5人。     一九四九年,蔣介石ui3中國大陸hong5掃出來台灣,就一直實施一九四八年通過e5動員戡亂時期臨時條款,及一九四九年頒佈e5台灣省戒嚴令,hou7蔣介石ti7台灣那像皇帝有絕對e5權力,掠、關、刑、刣,偌濟台灣民主運動前輩及反對伊e5人受迫害及喪失性命。In子蔣經國總統才ti7伊死十二年了後e5一九八七年解除三十八年久、破世界紀錄e5戒嚴;動員戡亂時期臨時條款,hou7蔣介石免受憲法總統任期兩任e5限制,伊做總統四、五任做到死,chit個惡法ma7是伊死了十六年後,才佇李登輝總統任內廢掉,一個「臨時」竟然就是四十三年!馬英九一向反對解除戒嚴,而後反對廢除刑法一百條,路尾反對總統直選,會使講是台灣民主運動e5塞路石。   咱看香港民主遊行gia5蔣介石和馬英九這兩個反民主e5人出來,咱就知影香港民主運動無望ah!因為in e5民主遊行行倒退。
 
< Prev   Next >