首頁 arrow 綠色短評 arrow 用馬英九的話塞伊家己的嘴!

用馬英九的話塞伊家己的嘴! PDF Print E-mail
Written by 李南衡   
Friday, 13 September 2013
九月初六早起,王金平拄拄上飛機beh去馬來西亞,特偵組就連發三通簡訊͘記者講有重大司法風紀結案記者會,特別註明「切勿錯過。」佇記者會中,特偵組指出民進黨立委柯建銘佇牽涉「全民電通案」更一審無罪了後,涉嫌透過立法院長王金平、法務部長曾勇夫、高檢署檢察長陳守煌等人關說,致使高檢署檢察官林秀濤放棄上訴。因為曾勇夫kah陳守煌查無刑事不法,兩人分別移送監察院kah檢察官評鑑委員會調查。曾勇夫罵特偵組「羅織罪名,令人不齒!」但是馬英九總統介入、行政院長江宜樺兩遍約談了後,Hit晚九點五十分開記者會宣佈辭職,事後有講是行政院江院長逼伊辭的。原來che是檢察總長黃世銘八月三十風颱暗透暝去向馬總統報告,講是監聽柯建銘意外得tio̍h的通訊資料。

九月初八下晡,馬英九總統明知立法院長王金平去馬來西亞參加in查某子的婚禮,竟然開記者會大罵王金平,叫伊tio̍h盡速轉來台灣向逐個講清楚。Che那像最近幾年台灣一種足垃圾鬼的賊仔,偷人信箱內的紅帖仔,趁人辦喜事無人佇厝裡,照時間地點去新郎新娘的厝偷the̍h.。馬賊仝款用chit種步數拍王金平。「人teh嫁查某子,伊teh吹狗螺。」明明是teh chhek衰王金平。歹人無膽,馬英九叫副總統吳敦義、行政院長江宜樺伊壯膽徛作夥。干單偷錄柯建銘kah王金平的一段對話,就認定in kah曾勇夫一捾人有「關說」。若有影有關說的證據是犯法,應該照司法程序去辦,那會使親像永過烏社會私設刑堂咧!

相對的是2007年八月十六,檢察官侯寛仁是beh對馬英九特別費官司提起上訴的敏感時刻,中國國民黨立法院黨團由政策會執行長曾永權chhōa一陣中國國民黨籍立委,去最高檢察署拜會檢察總長陳聰明,佇各媒體攝影機頭前,公然施壓,直接對陳聰明提出要求侯寛仁,對中國國民黨總統候選人馬英九使再上訴。Hit下晡,曾永權koh奉當時中國國民黨秘書長吳敦義的命令,去kah立法院長王金平見面,希望kah侯寛仁有親成關係的王金平去勸侯寛仁mài koh上訴馬英九特別費案,王金平斷然拒絕講:用地做,無能力去做!

 

Chit幾工馬英九總統開幾遍記者會罵王金平的話,每一句攏會使捒還͘ 2007年八月十六的中國國民黨總統候選人馬英九:「Chit工是台灣民主法治發展上蓋恥辱的一工!」「Che是關說,啥物才叫作關說?」「關說司法是事實,Che那像鐵的事實佇咱的眼前。」「伊對司法關說的部分完全無答,甚至連一句會失禮的話都無。」「咱那會tàng目睭金金看tio̍h中國國民黨chit-ê百年的政黨,因為關說司法蒙受羞辱!」用馬英九chiah-ê話塞(tat) 伊家己的嘴,看伊beh按怎喘氣!

※週一8點整、13點整、17點整於電台播出。

 
< Prev   Next >