首頁 arrow 綠色短評 arrow 總統府志工按怎導覽?

總統府志工按怎導覽? PDF Print E-mail
Tuesday, 22 July 2008
台灣行政院觀光局e5簡體字網站,為tioh8迎接中國觀光客,連中華民國chit個國名及國旗ma7攏phang3見去,首都台北市煞變作台灣第一大都市;這ma7莫怪,因為中國國民黨主席吳伯雄去中國訪問,見tioh8中國國家主席胡錦濤,講起馬英九總統e5時ka7叫作「馬先生」,koh khah悲哀e5是,連馬英九總統本人都講,有一工中國官員若來台灣訪問,叫伊「馬先生」就會使得。khah趣味e5是中國人講起「中國國民黨主席」吳伯雄,竟然講伊是「國民黨主持人」,會hou7人想講中國國民黨是馬戲團抑是啥物娛樂節目,聽tioh8直直欲笑出來。可憐啊!現此時中華民國政府及中國國民黨頭人,看tioh8中國人抑是聽tioh8中國人,歸身軀骨頭隨時軟了了,連徛都徛be7 chai7。 七月初八,有一個ui3第三地來台灣e5中國觀光團,雖然m7是七月初四來台灣hit e5中國旅客首發團,總是in是頭一個以中國觀光客團體e5名義申請入去總統府參觀。有一位導覽志工蔡勝進先生佇導覽e5時,攏無閃避「總統」、「總統府」等字眼,及伊以往e5導覽完全仝款,應該按怎講就按怎講,甚至看相片紹介日治時代歷任台灣總督e5像,ma7講出每一位總督主要e5政績。講到台灣歷任總統e5時,伊講,恁看李登輝、陳水扁及馬英九總統,逐個都笑微微,因為in是台灣人一票一票投票選出來e5總統。m7但是按呢,國會議員、各縣市長、縣市議員,甚至到鄉鎮長及鄉鎮民代表,ma7攏是人民直接選出來e5,這就是台灣e5民主經驗。   Chit位導覽志工蔡勝進先生特別用手指馬英九總統像下面e5空位,伊講,佇台灣凡若滿四十歲e5人攏有資格競選總統,若當選就會使ka7伊e5相片貼ti7 chia。競選總統是「人人有機會,個個無把握。」伊半滾笑講,有一工我e5相片ma7有可能貼ti7 chia neh,引起中國觀光客一陣笑聲。伊講,早前蔣介石總統做了換in子蔣經國做總統,彼tang陣小學生作文寫「我e5志願」e5時,攏ma7寫講將來大漢欲做「蔣總統」。一九九六年開始由人民直選總統以後,學生囝仔才瞭解,原來姓李姓陳姓馬姓啥,攏會使做總統,無一定tioh8姓蔣。   民主、自由、人權,是普世價值,ma7是咱台灣人驕傲e5所在,馬英九總統及文武百官,那像感覺民主、自由、人權是真見笑e5代誌,抑是驚無民主e5中國觀光客聽了見笑轉生氣。事實上台灣記者問參觀了總統府e5中國觀光客對台灣民主政治有啥看法e5時,有觀光客一再表示:「真歆羨!」「真數想!」   拜託馬英九總統及政府官員逐工tioh8會記得食鈣片,骨頭才會碇!
 
< Prev   Next >